Vüsalə Məmmədova: 

İqlim dəyişikliyi ilə mübarizədə yenilikçi texnologiyalar

Dostlar, bilirsiniz ki, ən müasir texnologiyalar iqlim dəyişikliyi ilə mübarizədə vacib rol oynayır. Lakin onun müəyyən zərərləri də var. Məsələn, elektron tullantılar kimi!

Elektron tullantı nədir?

Məsələn, gündəlik həyatımızda istifadə etdiyimiz kiçik batareyalar. İstifadə müddəti bitdikdən sonra onu təbiətə atırıqsa, ətrafa müəyyən radiasiya zərəri vermiş oluruq. Ona görə də batareyaları hara gəldi tullamaq yox, toplayıb konkret bir ünvana təhvil vermək lazımdır. Başqa bu cür misallar da çəkə bilərəm, amma vaxtınızı almayım, davam edək

Yeni texnologiyaların ətraf mühitə, iqlimə mənfi təsirlərini yumşaltmaq məqsədilə COP tarixində ilk dəfə Rəqəmsallaşma Günü keçirilib.

Bu çərçivədə Yaşıl Rəqəmsal Fəaliyyət üzrə dəyirmi masa təşkil olunub. Tərəfdaşlardan biri də Rəqəmsal İnkişaf və Nəqliyyat Nazirliyidir.

Tədbirdə Yaşıl Rəqəmsal Fəaliyyət üzrə COP29 Bəyannaməsi qəbul edilib.

Nəqliyyat Günündə isə nəqliyyat sektorunun yaşıllaşdırılması və aviasiyanın karbon tullantısının azaldılması müzakirə edilib, kollektiv öhdəliyi əks etdirən kommunike qəbul olunub.

Vəziyyəti daha aydın izah eləmək üçün bəzi rəqəmlərə baxaq.

Dünyada karbon emissiyalarının 23%-i nəqliyyat sektorunun payına düşür. 1990-cı ildən etibarən zərərli tullantıların ən sürətli artımı məhz nəqliyyat və sənaye sektorunda baş verir. Vəziyyət belə davam etsə, 2050-ci ilə qədər nəqliyyat sektorunda emissiyaları ikiqat arta bilər.

Düşünürəm ki, rəqəmsallaşma və nəqliyyat üzrə əldə olunan bu razılaşmalar iqlim böhranının aradan qaldırılmasına kömək edəcək və ekoloji cəhətdən daha təmiz dünyada yaşama şansı qazanacağıq.