Qızlardan ibarət U-16 voleybol komandamız EEVZA-da ikinci dəfə büdrəyib 

Artıq iki gündür ki, Polşanın Debiça şəhərində 16 yaşadək voleybolçu qızlar arasında Şərqi Avropa Voleybol Zonal Assosiasiyası (EEVZA) çempionatı keçirilir. Çempionatda Azərbaycan da daxil olmaqla 7 komanda iki qrupda mübarizə aparır. Qeyd edək ki, Estoniya, Litva və Ukrayna ilə birlikdə B qrupunda yer alan Azərbaycan yığması bu çempionatda keçirdiyi ilk iki oyunun hər ikisində məğlubiyyətlə üzləşib. Xatırladaq ki, ilk turda Estoniya komandasına quru hesabla (0:3) məğlub olan Şahin Çatmanın rəbərlik etdiyi U-16-mız bu gün baş tutan ikinci turda isə eyni hesabla Litva yığmasına uduzub -  0:3 (16:25, 11:25, 10:25).

Sabah isə Azərbaycan komandası qrupda son matçını Ukrayna komandasına qarşı keçirəcək.

Türkiyəli mütəxəssis Şahin Çatma EEVZA çempionatına apardığı U-16 millimizin heyətinə aşağıdakı voleybolçuları cəlb edib:

Oyunçular: Nisə Əlizadə, Mələk Hacızadə, Aysel Nəbiyeva, Fatimə Əliyeva, Liel Vetkina, Kamilla Manaxova, Çinarə Yusubova, Aylin Əlizadə, Dilarə Ağayeva, Nuray Vahablı, Zeynəb Quluzadə, Mədinə Əlibəyova, Məryəm Qocayeva, Çinarə Rəhimova.

Baş məşqçi - Şahin Çatma, məşqçilər- Hamid Anvari, Pərvin Səfərli.

Yeri gəlmişkən, bu yarış “AVRO-2025”ə seçmə xarakteri daşıyır. Reqlamentə əsasən, çempion adına qazanan komanda qitə birinciliyinin final mərhələsinə vəsiqə əldə edəcək.

İNTİQAM Məmmədov