Leyla Əliyeva Bakıda fiziki məhdudiyyətli insanların işlədiyi inklüziv kafedə olub

Heydər Əliyev Fondunun vitse-prezidenti Leyla Əliyeva Bakıda sağlamlıq imkanları məhdud gənclərin də çalışdığı ilk və yeganə inklüziv qida obyekti olan “Kaşalata” kafesində olub.

Leyla Əliyevanı əmək və əhalinin sosial müdafiəsi naziri Sahil Babayev, kafenin həmtəsisçiləri Natavan Məmmədova və Aytən Eynalova qarşılayıblar.

Əlilliyi olan şəxslərin inklüziv mühitdə məşğulluğunun dəstəklənməsi məqsədilə yaradılan bu inklüziv kafenin fəaliyyəti barədə Heydər Əliyev Fondunun vitse-prezidentinə məlumat verilib. Bildirilib ki, Bakının Ü.Hacıbəyli küçəsi 57 ünvanında yerləşən “Kaşalata” kafesi “Birgə və Sağlam” İctimai Birliyinin təşəbbüsü ilə yaradılıb.

Əmək və Əhalinin Sosial Müdafiəsi Nazirliyi, Kiçik və Orta Biznesin İnkişafı Agentliyi, SOCAR, “Paşa Holdinq” və “Trendyol Azərbaycan”ın dəstəyi ilə yaradılan “Kaşalata” kafesində işlə təmin olunan 20 gəncdən 10-u sağlamlıq imkanları məhdud şəxslərdir.

Leyla Əliyeva kafedə yaradılan şərait və iş mühiti ilə tanış olub, burada işlə təmin olunan sağlamlıq imkanları məhdud gənclərlə görüşüb söhbət edib.

Autizmli gənclərdən ibarət “Mavi ürəklər” xoru və ritm qrupu “Sən Ey Uşaqlıq” mahnısını ifa edib. Autizmdən əziyyət çəkən insanlar Leyla Əliyevaya öz əl işlərini hədiyyə ediblər.

Heydər Əliyev Fondunun vitse-prezidenti “Kaşalata” inklüziv kafesinin işçiləri ilə xatirə şəkli çəkdirib.