Futbol üzrə əsas millimiz İsveçdə darmadağın edilib 

Azərbaycan millisi Fernandu Santoşun "sayəsində" daha zəif liqaya yuvarlanıb 

Bu gün gecə saatlarında futbol üzrə UEFA Millətlər Liqasının C divizionunda qrup oyunları çərçivəsində sayca 6-ci olan son turun oyunları keçirilib. Liqanın 1-ci qrupunda yer alan Azərbaycan millisi son matçını səfərdə İsveç komandasına qarşı keçirib. Qeyd edək ki, Solna şəhərindəki "Strouberri Arena"da baş tutan və taleyi polşalı referi Pavel Rackovskiyə həvalə edilən oyun ev sahibinin darmadağın hesablı qələbəsi ilə başa çatıb. Yeri gəlmişkən, Bakıda keçirilən ilk oyunda 1:3 hesablı qələbə qazanan İsveç komandası doğma divarlar arasında baş tutan bu oyunda isə millimizin qapısına hər hissədə 3 qol vurub - 6:0. Vurulan qollardan ikisi Deysn Kulisevskinin (10 və 57-ci dəq.), dördü isə Viktor Dekereşin (26, 37, 58 və 70-ci dəqiqə) aktivinə yazılıb. 

Bununla da, portuqaliyalı baş məşqçi Fernandu Santoşun rəhbərliyi altında 6-ci dəfə meydana çıxan Azərbaycan millisi 5-ci dəfə meydanı məğlub durumda tərk edib. Qeyd edək ki, Santoşun rəhbərliyi altında keçirdiyi 6 oyunda cəmi bir xal toplamaqla yer aldığı qrupda sonuncu olan Azərbaycan yığması məhz bu məşqçinin "əməyi sayəsində" UEFA Millətlər Liqasının C divizionunu tərk edərək daha zəif hesab edilən D dəstəsinə yuvarlanıb.

Xatırladaq ki, Azərbaycan millisi qrupda Slovakiyaya qarşı ev oyununda 0:2, səfərdə isə 1:3 hesabla uduzub. Estoniya ilə ev oyununda qolsuz heç-heçəyə nail olan millimiz səfərdə 1:3 hesabla məğlub olub.

Azərbaycan millisinin yer aldığı 1-ci qrupda yekun turnir cədvəli belədir:

Komanda     O    Q    H    M    T/F    X

1. İsveç     6    5    1    0    19:4    16

2. Slovakiya    6    4    1    1    10:5    13

3. Estoniya     6    1    1    4    3:9    4

4. Azərbaycan    6    0    1    5    3:17    1.

İNTİQAM Məmmədov