Heydər Əliyev Mərkəzində “Ana Təbiət” bədii layihəsi və “İştirak et!” sərgisi açılıb

Noyabrın 14-də Heydər Əliyev Mərkəzində “Ana Təbiət” beynəlxalq incəsənət layihəsinin və “İştirak et!” sərgisinin açılış mərasimi olub.

Sərgilərin açılışında Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva, Bakı Media Mərkəzinin rəhbəri Arzu Əliyeva və onların ailə üzvləri iştirak ediblər.

Heydər Əliyev Fondunun vitse-prezidenti Leyla Əliyeva BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası çərçivəsində başlanmış MAMA “Ana Təbiət” beynəlxalq incəsənət layihəsinin ideya müəllifidir. Layihə çərçivəsində nümayiş olunan ekspozisiya IDEA İctimai Birliyi və Heydər Əliyev Mərkəzi tərəfindən təşkil olunub.

BMT-nin Cenevrə bölməsinin baş direktoru Tatyana Valova və IDEA ictimai birliyinin rəhbəri Leyla Əliyevanın birgə təşəbbüsü ilə Heydər Əliyev Mərkəzi və İsveçrə Qadınları və Gücləndirilməsi Assosiasiyası tərəfindən ətraf mühitin mühafizəsi mövzusunda tədbir keçirilib.

Tədbirdə çıxış edən Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva sərgilənən əsərlərin ziyarətçilərə müsbət enerji verəcəyinə ümidvar olduğunu bildirib. O, sərginin yaradılmasında əməyi keçən hər kəsə təşəkkürünü bildirib.

Leyla Əliyeva ölkəmizin ev sahibliyi etdiyi COP29-da Azərbaycanda görülən işlər sayəsində bir çox müsbət nəticələrin əldə olunacağına əminliyini ifadə edib.

Heydər Əliyev Fondunun vitse-prezidenti son vaxtlar planetimizdə iqlim dəyişikliyinin yaratdığı problemlərdən, eləcə də havanın, torpağın, suyun çirklənməsinin bir sıra mənfi nəticələrindən danışıb. İqlim dəyişikliyi və çirklənmənin Azərbaycanın ekosisteminə ciddi təsir göstərdiyini vurğulayan Leyla Əliyeva mövcud problemlərin həllinə böyük nikbinliklə, yaradıcılıqla yanaşdıqlarını bildirib. O, həmçinin qeyd edib ki, 2011-ci ildə yaradılmış IDEA İctimai Birliyinin fəaliyyəti ekoloji problemlərin həllinə yönəlib.

Sonra çıxış edən türkiyəli rəssam Seval Özcan möhtəşəm beynəlxalq sərginin təşkilinə görə Heydər Əliyev Fondunun vitse-prezidenti Leyla Əliyevaya dərin təşəkkürünü bildirib. Təbiətin insanlara deyil, insanlara ehtiyacı olduğu, bu gün dünyanın böyük təhlükə altında olduğu vurğulanıb. S.Özcan bildirib ki, iqlim dəyişikliyi ilə bağlı Bakıda keçirilən tədbirlər belə çətinliklərin yaşandığı bir vaxtda çox önəmlidir.

BMT-nin Cenevrə bölməsinin baş direktoru Tatyana Valovaya tədbir iştirakçılarına videomüraciətində Leyla Əliyevanın rəhbərliyi ilə IDEA İctimai Birliyinə, həmçinin Heydər Əliyev Fonduna və İsveçrə Qadınları və Səlahiyyətlərinin artırılması Assosiasiyasına təşəkkürünü bildirib. 

“Bu iki sərgi Üzv Dövlətlərin Gələcək Paktında öz əksini tapmış öhdəliklərinə, eləcə də COP29-un əsas müzakirə mövzusu olacaq fəaliyyətlərə uyğundur. Bundan əlavə, bu sərgilər mənim ürəyimə xüsusilə yaxındır, çünki onlar incəsənətin texnologiya və ətraf mühitlə bağlı öhdəliklərlə kəsişdiyi anları əks etdirir. Bu cür əsərlər bizə biganəliyin fəsadlarını xatırladır və hər bir tamaşaçını planetimizdə təbiətin mühafizəsinin sözçüsü kimi öz rolu haqqında düşünməyə vadar edir. Bu sərgilər bizi fəaliyyətə çağırır və seçimlərimizin təsiri və gələcək nəsillərə qoyacağımız irs haqqında düşünmək üçün qida verir”, - deyə Tatyana Valova videomüraciətində bildirib.

Qonaqlar sərgi ilə bağlı təəssüratlarını Azərtac ilə bölüşüblər. İşa xeyriyyə fondunun təsisçisi, məşhur hind yogi Sadhquru (Caggi Vasudev) dünyamıza və xüsusən də sənətə qayğı göstərməyin vacibliyini vurğuladı. Onun fikrincə, dünyaya qayğının ən gözəl ifadəsi insanların ruhuna toxunan sənətə, musiqiyə qayğıdır.

Rəssam Kamran Məmmədov qeyd edib ki, onun sərgidə nümayiş etdirdiyi əsərlər məşğuliyyətindən asılı olmayaraq hər kəsin planetimizə, təbiətimizə qayğı göstərməsinin vacibliyinə diqqəti cəlb edir.

Heykəltəraş Ömər Heydərov sərginin çoxşaxəli olduğunu və burada incəsənətin bütün növlərinə aid əsərlərin yer aldığını vurğulayıb. O, sərginin təbiətin gözəlliyini nümayiş etdirdiyini, həm də onu qorumağa çağırdığını bildirib.

28 ölkədən – Azərbaycan, ABŞ, Almaniya, Böyük Britaniya, Braziliya, Cənubi Koreya, Gürcüstan, Hindistan, İspaniya, İsrail, Latviya, Pakistan, Rusiya, Türkiyə, Ukraynadan 55 rəssamı birləşdirən MAMA “Ana Təbiət” beynəlxalq incəsənət layihəsi s. ., sənət vasitəsilə planetimizi gələcək nəsillər üçün qorumağa çağırır. Müxtəlif ölkələrdən, müxtəlif millətlərdən olan müəlliflər öz əsərləri ilə insanların şüuruna təsir göstərməyə, onların diqqətini cəlb etməyə çalışırlar.