“Sənə Zəfər Yaraşır, Azərbaycan!” – Masallıda konfrans

Masallı şəhər Heydər Əliyev Mərkəzində Masallı Rayon İcra hakimiyyətinin təşklatçılığı ilə 8 Noyabr - Zəfər Günü və “Şuşa Şəhəri Günü” ilə əlaqədar “Sənə Zəfər Yaraşır, Azərbaycan” adlı konfrans keçirilib.

Konfransdan öncə tədbir iştirakçıları şəhər mərkəzində Ulu öndər Heydər Əliyevin abidəsini və “Qəhrəmanlar Parkı - Şəhidlər Abidə Kompleksi”ni ziyarət edərək Ümumilli Liderə və şəhidlərimizə ehtiramlarını bildirib, abidələr önünə gül dəstələri düzüblər.

Konfrans öncəsi Ulu Öndər və Azərbaycanın suverenliyi, ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib, sonra videoçarx izlənilib.

Masallı Rayon İcra Hakimiyyətinin başçısı Araz Əhmədov çıxışında qeyd edib ki, noyabrın 8-də 28 illik həsrətdən sonra xalqımız üçün böyük əhəmiyyət kəsb edən və rəmzi məna daşıyan Şuşa şəhəri işğaldan azad edildi: “Qarabağın tacı olan Şuşa şəhərinin azad edilməsi dünya hərb tarixinə düşəcək unikal hərbi əməliyyatlardan oldu. “Dəmir Yumruq” əməliyyatı ilə Azərbaycanın yeni tarixi yazıldı. Bu zəfər müasir dövlətimizin hərbi qüdrətinin və xalqın qələbə əzminin əyani təsdiqi oldu. 

Ali Baş Komandan, Prezident İlham Əliyevin rəhbərliyilə 30 illik münaqişəni 44 günə sona çatdırdıq. Rəşadətli Ordumuz, igid əsgərlərimizin şücaəti ilə bu qəhrəmanlıq savaşımız tarix boyu şanlı qürur mənbəyimiz olaraq qalacaq...”

Millət vəkili Məşhur Məmmədov, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Tural Məmmədov, şəhid atası Qorxmaz Novruzov, Vətən müharibəsi iştirakçısı, ehtiyatda olan mayor Bəhruz Mehbalıyev və Qafqaz Müsəlmanları İdarəsinin Masallı rayonu üzrə qazısı Rəşid Talıbov bildiriblər ki, hərbçilərimizin psixoloji hazırlığı, vətənpərvərlik hissi, döyüş ruhu çox yüksəkdir və tarixi zəfərimizlə bütün beynəlxalq ictimaiyyət bir daha bunun canlı şahidi oldu. 44 günlük Vətən müharibəsiylə biz bütün dünyaya göstərdik ki, yenilməz xalqıq. 

Tədbir Masallı Mədəniyyət Mərkəzi solistlərinin konsert proqramı ilə yekunlaşıb.

Akif AĞAYEV