Azərbaycanın yunan-Roma güləşi üzrə yeniyetmələr komandası Gimnaziadada ikinci olub

Bəhreynin paytaxtı Manamada yeniyetmələr arasında keçirilən və Azərbaycan komandasının da qatıldığı Bəhreyn -2024 Gimnaziada İdman Oyunlarına yunan-Roma güləşi üzrə baş tutan yarışla yekun vurulub. Qeyd edək ki, bu yarışda ölkəmizi böyük məşqçi Taleh İsrafilov və məşqçi Rasim Ağayevin rəhbərliyi altında təmsil edən 13 güləşçimizdən 10-u daha inamla güləşərək mükafatçıar sırasında yer alıb. Bunlardan biri qızıl, altısı gümüş və üçü bürünc medal qazanıb. Ən yaxşısı nəticəni 110 kq-da çıxış edən Mikayıl İsmayılov göstərib. Bütün rəqiblərini məqlub edən Mikayıl Gimnaziadanin qalibi olub. Yalnız həlledici finalda büdrəyən Hüseyn Əliyev (45 kq), Şahid Nəbiyev (48 kq), Nihat Bəhmənov (51 kq), Əmrah Əmrahov (55 kq), Asif Nəcəfli (65 kq) və Yusif Əhmədli (71 kq) ikinci yeri tutmaqla gümüş medalla kifayətlənib. Bürünc əyarlı medallar isə çıxışını üçüncü yerdə bitirən Turan Daşdəmirov (55 kq), Nihat Taqiyev (60 kq) və Emil Abasovun (80 kq) aktivinə yazılıb.

Yunan-Roma güləşi üzrə komandamız 10 medal və 185 xalla komanda hesabında ikinci yeri tutub.

Xatırladaq ki, yunan-Romacilardan öncə sərbəst güləş yığmamız 11 (1+2+8), qızlar komandamız isə 3 (1-1-1) medal qazanıb.

İNTİQAM Məmmədov