Sinner 1\2 finalda Cokoviçi, Alkaras isə Nadalı məğlub edərək finala yüksəlib 

Səudiyyə Ərəbistanının Ər-Ryad şəhərində təşkil edilən mədəni-əyləncəli festivalın  (Riyadh Season Festival) proqramına daxil olan tennis üzrə "6 Kings Slam" ("6 kralın dəbilqəsi") turniri artıq başa çatmaq üzrədir. Qeyd edək ki, oktyabrın 16-da startı verilən və mükafat fondu 13,5 milyon dollar təşki edən bu dəbilqə turnirində dünyanın bir nömrəli raketka ustası Yannik Sinner, serbiyalı Olimpiya çempionu Novak Cokoviç, ispaniyalı tennisçilər Rafael Nadal və Karlos Alkaras, danimarkalı Xolqer Rune və rusiyalı Daniil Medvedev mübarizəyə qatılıb. Turnirin formatına əsasən yarışa iki 1\4 final oyunu ilə start verilib. Burada Sinner - Medvedev və Alkaras - Rune qarşılaşması olub. Cütlərin qalibləri 1\2 finala çıxaraq, mübarizəni davam etdiriblər. Birinci cütün qalibi Yanik Sinner 1\2 finalda Novak Cokoviçlə qarşılaşıb. 2 saat 27 dəqiqə davam edən oyun Sinnerin qələbəsi ilə bitib - 6:2, 6:7 (0:7), 6:4.

Alkaras - Rune qarşılaşmasında isə ispaniyalı raketka ustası qalib gələrək yarımfinala yüksəlib. Maraqlıdır ki, Alkaras yarımfinalda öz həmyerlisi olan və uşaq vaxtlarından oyununa pərəstiş etdiyi Rafael Nadalla qarşılaşıb. Bu qarşılaşmada da təcrübə deyil, gənclik öz sözünü deyib. 1 saat 18 dəqiqə davam edən görüş Alkarasın 6:3 və 6:3 hesablı qələbəsi ilə bitib. 

Reqlamentə görə yarımfinalın qalibləri olan 23 yaşlı Sinnerlə 21 yaşlı Alkaras həlledici finalda, yarımfinalda büdrəyən "Böyük Dəbilqə"nin 24 qat qalibi Cokoviçlə Nadal isə üçüncülük uğrunda qarşılaşacaq. 

Finalın qalibinə 6 milyon dollar mükafat veriləcək. Qalan 5 tennisçi isə iştirak etdiyi üçün 1,5 milyon əldə edəcək 

İNTİQAM Məmmədov