Azərbaycan Gimnaziadada 28 güləşçi ilə təmsil olunacaq 

Oktyabrın 24-dən 30-dək Bəhreynin paytaxtı Manamada 17 yaşlı (U-17) yeniyetmələr arasında multi-idman yarışı keçiriləcək. Söhbət idmanın 26 növü üzrə yarışların keçirilməsi nəzərdə tutulan və Azərbaycan idmançılarının da qatılacağı Gimnaziadadan gedir. Azərbaycan Güləş Federasiyasından verilən məlumata görə, bu multi-idman yarışında Azərbaycanın U-17 güləş komandaları da iştirak edəcək. Gimnaziadanın proqramına daxil olan güləş yarışıarı 28-30 oktyarbr günlərində keçiriləcək. Artıq iştirakçı komandalarımızın heyəti də müəyyənləşib.

Qeyd edək ki, böyük məşqçi Əsgərxan Novruzov və məşqçi Yaşar Əliyevin rəhbərlik etdiyi sərbəst güləş komandamızın heyətində 11 güləşçi yer alıb: Rəvan Həsənzadə (48 kq) Ramal Mirhüseynov (51 kq), Hüseyn Hüseynov (55 kq), Həsən Həsənov (60 kq), Hüseyn İsmayılov, Fərid Ağasızadə (hər ikisi 65 kq),Nihad Abasov, Rəşad Veysəlov (hər ikisi 71 kq), Nihad Süleymanlı (80 kq), Fərhad Süleymanlı (92 kq), Hakim Tağıyev (110 kq).

Böyük məşqçi Rövşən Umudov qızların yarışında 4 güləşçinin xidmətindən yararlanacaq: Bu dördlükdə Nəzrin Əhmədli (43 kq), Fatimə Bayramova (53 kq), Esra Məmmədli, Fidan Babayeva (hər ikisi 57 kq) cəmləşib.

Böyük məşqçi Taleh İsrafilovla məşqçi Rasim Ağayevin rəhbərliyi altında bəlli yarışa qatılacaq yunan-Roma güləşi üzrə yığmamızın heyətində isə aşağıdakı güləşçilər yer alıblar:

Hüseyn Əliyev (45 kq), Şahid Nəbiyev (48 kq), Elşad Abbasov, Nihat Bəhmənov (hər ikisi 51 kq), Turan Daşdəmirov, Əmrah Əmrahov (hər ikisi 55 kq), Nihat Tağıyev (60 kq), Akif Nəcəfli (65 kq), Yusif Əhmədli (71 kq), Nicat Yeylaqaliyev, Emil Abasov (hər ikisi 80 kq), Səid Paşayev (92 kq), Mikayıl İsmayılov (110 kq).

71 ölkənin iştirak edəcəyi Gimnaziadada daha iki təmsilçimiz - I dərəcəli hakim Kamran Əliyev və II dərəcəli referi Əli Babayev ədaləti qoruyacaq.

İNTİQAM Məmmədov