“Kitabxanaya kitab hədiyyə edirik” layihəsi uğurla davam edir

Bakı Şəhər Mədəniyyət Baş İdarəsi Yasamal rayon MKS-nin M.Ş.Vazeh adına Mərkəzi Kitabxanasında həyata keçirilən “Kitabxanaya kitab hədiyyə edirik” layihəsi çərçivəsində yazıçı, şair Məhəbbət İbrahimova qələm dostu şair-dramaturq Ramiq Muxtarın kitablarını kitabxanaya hədiyyə etdi.
Şair-dramaturq, Prezident təqaüdçüsü Ramiq Muxtar uzun illərdir ki, bədii yaradıcılıqla məşğul olur. Onun sözlərinə 120-dən artıq mahnı bəstələnmişdir. Şair Beynəlxalq Rəsul Rza Mükafatı, Gürcüstanın “Şərəf” ordeni ilə təltif olunmuşdur. Onun yazdığı “Dünya Azərbaycanlılarının birlik nəğməsi” Dünya Azərbaycanlılarının I qurultayında Ulu Öndər Heydər Əliyevin göstərişi ilə bütün qurultay nümayəndələrinə paylanmışdır.
Ramiq Muxtarın “Seçilmiş əsərləri”nin I cildinə müəllifin 60 yaxın şeiri və mahnı mətnləri, bir poeması, üç pyesi daxil edilmişdir. Onun Bakı, İrəvan, Naxçıvan, Ağdam teatrlarında tamaşaya qoyulan əsərləri böyük marağa səbəb olmuşdur. 
Ramiq Muxtar  “Seçilmiş əsərləri”nin III cildini cənab Prezident İlham Əliyevə ithaf etmişdir. Kitabda “Baş komandan”, “Millət atası”, “Mehriban”, “Bakı islam oyunları”, “Bakı-Tbilisi-Ceyhan” və b. şeirlər var. Kitabda “Mizrab”ın tapmacaları adlı baməzə tapmacalar və müəllifin şeirlərinə bəstələnmiş mahnılar da yer alır. Kitabdakı “Mənim oyaq yuxularım” povesti “2016-cı ilin ən gözəl əsəri” kimi I yerə layiq görülmüşdür. Kitabda “Ürəyimdən keçən istəklərim...” bölməsində şairin ürəyindən keçən arzuları, istəkləri verilib.
“Mənim oyaq yuxularım” kitabının ilk səhifələrində şair-dramaturq Ramiq Muxtarın Azərbaycanın Birinci vitse-prezidenti Mehriban Əliyevaya təbrik və təşəkkür məktubu, ona həsr etdiyi şeir yer alır. Kitabda şair-dramaturq novellalardan ibarət olan simvolik yuxulardan istifadə etmişdir. Əsərin baş qəhrəmanı müəllifin atası Muxtar Nağıyevdir. Kitabın əsas ideyası Azərbaycanın tarixən üzləşdiyi ağrılı-acılı hadisələrdən bəhs edir. Müəllif erməni işğalı nəticəsində didərgin düşmüş qaçqın və məcburi köçkünlərin çəkdiyi əziyyətlər, yaşadıqları faciələri ürək ağrısı ilə qələmə alır.
Yazıçının yuxularında Türkiyənin sabiq prezidenti Turqut Özal, böyük şair Məhəmməd Füzuli, alim, filosof Nəsrəddin Tusi, aşıq Şəmşir və digərləri ilə söhbətlər də maraq doğurur. 
Oxucular R.Muxtarın kitabları ilə Yasamal rayon MKS-nin kitabxanalarında tanış ola bilərlər.