Fikrət Şiriyev:

Xalqımızın son yüz ildə yetişdirdiyi böyük şəxsiyyətlərdən biri, doğum günün mübarək!

Oktyabrın 3-də Azərbaycan təhsilinin fədailərindən biri, xalqımızın son yüz ildə yetişdirdiyi böyük şəxsiyyətlərdən və sevimli övladlarından biri, hamı tərəfindən qəbul edilən nadir insan, Bakı Dövlət Universitetinin rektoru(1997-1998), Respublikamızın Təhsil naziri(1998-2013),Ali riyaziyyat kafedrasının müdiri(2002-ci ildən), 1-ci dərəcəli "Vətənə xidmətə görə" və "Şöhrət" ordenlərinin və digər çoxsaylı mükafatların sahibi,"Əməkdar elm xadimi", "Qızıl qələm" media mükafatı laureatı, "Dağıstan Respublikasının Əməkdar elm xadimi", AMEA-nın müxbir üzvü, professor Misir Cumayıl oğlu Mərdanov anadan olmuşdur.

Bu sadə və nəcib, xeyirxah və təvazökar, dekan müavini olanda da, nazir vəzifəsində fəaliyyət göstərəndə də dəyişməyən, həmişə, hamıya vaxt ayırmağı, diqqət göstərməyi bacaran, bütün insanların daxili aləmini həssaslıqla başa düşən və hər kəsə kömək etməyə çalışan nadir insan haqqında saatlarla, günlərlə danışmaq, cild-cild kitablar yazmaq olar. Mən böyük maraq doğuracağını nəzərə alaraq öz həyat yolu haqqında yazdığı kitabından kiçik bir hissəni dostların mühakiməsinə verirəm.

“Mən də dünyanın əksər adamları kimi təsadüflərə inanmıram. Ancaq ömrümün bu mərhələsindən baxanda bəzi fəlsəfi cərəyanlarda həyatın proqramlaşdırıldığı, əvvəlcədən hər şeyin müəyyənləşdirildiyi barədə fikirlərlə, “alın yazısı” adlı mövhumi inanclarla hərdən razılaşmalı oluram.

Qərbi Azərbaycanın Qaraqoyunlu dərəsinin uzaq Göyərçin kəndində dünyaya gələndə mənim adımı Arif qoyublar- məndən əvvəl doğulmuş, ancaq körpə ikən xəstələnib tələf olmuş qardaşımın adını. Mən də pis xəstələnəndə qonşu kəndin hörmətli bir din xadimi Quran açıb məsləhət bilib ki, adını dəyişin, yaşasın. Adımı elə onun açdığı kitabdan dediyi toponimə əsasən qoyublar. Bizimkilər bir az etiraz edəndə ki, belə ad kənddə-izdə yoxdur, bu ki, ölkə adıdır, bəlkə başqa ad deyəsiniz. Kişi məsləhət bilməyib, -“Quranda bu ad çıxdı, Allah bu adı rəva bildi, səhhəti də düzələcək, uzun ömür yaşayacaq, taleyini də Qurani-kərim xüsusi göstərir, gedin, mən deyəni edin.”

Maraqlıdır ki, mənim dünyaya gəlməyimdən bir az əvvəl atam soyadımızı da dəyişdirmişdi, məxsus olduğumuz Dəmirlilər tayfasının bir neçə öncül şəxsi qolçomaq adıyla repressiyaya məruz qalmışdı. Təhsilinə və digər göstəricilərinə görə Kolxoz sədri vəzifəsinə ən layiqli namizədin babalarının qolçomaq olması mümkün deyildi, ağsaqqalların məsləhəti ilə atam öz babası Mərdanın adını soyad kimi götürmüşdü. Beləliklə, mən Arif Dəmirov ola bilərdim, ancaq Misir Mərdanov oldum.

Mən ixtisasım üzrə həkim olmalıydım, o zaman orta məktəbdə ən yaxşı oxuyan şagirdlərdən biri kimi atam məni həkim görmək istəyirdi-kənddə və bölgədə ən çox ehtiyac duyulan və nüfuzlu peşə idi. Yaxın qohumum –Leninqradda (indiki Sankt Peterburqda) aspirant olan Niftalı Qocayevin elmi rəhbəri-dünya səviyyəsində tanınmış akademik M.V.Volkenşteynin kəndimizə gəlməsi həmin qərarın dəyişməsinə səbəb oldu (mən bu barədə bir az sonra ətraflı yazacağam). Bir az sorğu-sual, imtahan etdikdən sonra həmin akademik “bu uşağın parlaq riyazi təfəkkürü var, o gözəl riyaziyyatçı ola bilər”,-dedi və sevimli Mürsəl müəllimimin (kənd məktəbinin riyaziyyat müəllimi) arzusu bir addım da yaxınlaşdı-mən sənədlərimi Azərbaycan(indiki Bakı) Dövlət Universitetinin Mexanika-riyaziyyat fakültəsinə verdim. Bu da bir təsadüf idimi, yoxsa “alın yazısı” olan zərurət, deyə bilmirəm, ancaq mən həyatımın böyük hissəsini-təxminən 60 ilini keçirdiyim Bakı Dövlət Universitetinə belə bağlandım. Beləcə, Tibb Universitetinə də qəbul oluna bilərdim...”

Çox hörmətli Misir müəllimi ad günü münasibətilə təbrik edir, ona ilk növbədə cansağlığı, aktiv fəaliyyətində yeni uğurlar arzulayırıq.