"Qarabağ" qadın həndbol klubu AK-nin növbəti mərhələsində 

"Azəryol"la "Kür" isə Avrokubokla erkən vidalaşıb 

Dünən Azərbaycan təmsilçilərinin də iştirakı ilə qadın həndbolculardan ibarət klublar arasında Avrokubok yarışlarına start verilib. Həmin gün üç qadın klubumuz mübarizəyə başlayıb. Azərbaycan çempionu "Qarabağ" və gümüş mukafatcimiz "Azəryol" Avropa Kubokunda, ölkə kubokunun sahibi olan "Kür" isə Kuboklar Kubokunda iştirak edib. "Qarabağ"la "Azəryol" rəqibini evdə qarşılayıb. "Kür" isə Yunanıstanda yerli "İonias" klubunun qonağı olub.

Qeyd edək ki, mübarizəyə 1/32 finaldan qatılan "Qarabağ" Lüksemburqun "Differdanj" klubunu qəbul edib. Qarşılıqlı razılaşmaya əsasən hər iki oyun Bakıdakı "AHF Arena"da keçirilib. Dünən ilk oyunda rəqibini 26:25 hesabla məqlub edən "Qarabağ" bu gün baş tutan cavab matçında isə 27:24 hesabla udaraq adını növbəti mərhələyə yazdırıb. 

Bakıda eyni arenada Ukraynanın "Qalicanka" klubunu qəbul edən "Azəryol" isə cempiondan fərqli olaraq, dünən keçirilən ilk oyunda böyük fərqlə uduzub - 22:36. Bu gün baş tutan cavab matçında isə "Azəryol" yenə də məğlubiyyətlə üzləşib - 16:32. Bununla da, təmsilçimiz Avrokubokla erkən vidalaşıb.

"Kür" klubuna gəlincə, ölkə kubokunun sahibi dünən Yunanıstanın İonias şəhərində eyni adlı klubun qonaqi olub. Şəhərin Gimnastika Arena zalında keçirilən oyun ev sahibinin qələbəsi ilə bitib - 25:32. Bu gün isə rəqiblər cavab matçına çıxıblar. Qarşılaşma bu dəfə də ev sahibinin qələbəsi (22:33) ilə bitincə "Kür" də "Azəryol" kimi Avrokubokla erkən vidalaşıb.

Yeri gəlmişkən, kişilərin analoji yarısı isə oktyabrın 26-da başlayacaq. Həmin gün Azərbaycan çempionu "Kür" klubu Mingəçevirdə "Parnassos Strovoloi"ni qəbul edəcək. Ertəsi gün isə komandalar cavab matçına çıxacaqlar.

Azərbaycan çempionatının ikincisi olan "Bakı" isə həmin gün və eləcə də ertəsi gün Monteneqroda yerli "Lovcen Çətine"nin qonaqi olacaq. 

İNTİQAM Məmmədov