Qadın basketbol yığmamız AÇ-yə uğursuz başlayıb 

Bu gün Avstriyanın paytaxtı Vyanada kişi və qadınlar arasında 3x3 basketbolu üzrə növbəti Avropa çempionatına start verilib. Sayca 9-cu olan bu çempionatda Azərbaycan da daxil olmaqla, 12 komanda 4 qrupda (həm kişilərdə, həm də qadınlarda) mübarizəyə qatılıb. Əvəlcədən xəbər verdiyinmiz kimi, heyətində Dina Ulyanova, Tatyana Deniskina, Aleksandra Mollenxaurt və Mersedes Uolkerin yer aldığı qadın yığmamız İspaniya və Avstriya millisi ilə birlikdə C qrupunda yer alıb. Qeyd edək ki, Paris-2024-də ölkəmizi təmsil edən qadın yığmamız artıq ilk oyununu İspaniyaya qarşı keçirib. Təəssüflər olsun ki, yığmamız bir neçə gün öncə Dünya Qadın Seriyasının Bakı mərhələsində qalib olan İspaniya ilə bacarmayıb - 12:20. 

Qadın yığmamız qrupda  növbəti matçını bu gün saat 19:15-də ev sahibi olan Avstriyaya qarşı keçirəcək. Reqlamentə görə hər qrupda ilk iki yeri tutan komandalar 1\4 finala yüksələcəklər. Bu mərhələnin oyunları isə avqustun 24-də keçiriləcək. 

Avqustun 23-də isə kişilərin analoji yarışına start veriləcək. Heyəti Amil Həmzəyev, Cordan Devis, Cəbrayıl Əkbərov və Endar Poladxanlıdan ibarət olan kişi komandamız isə C qrupunda Hollandiya və Avstriya millisi ilə qarşılaşacaq.

Azərbaycanın debüt etdiyi Avropa çempionatında qadınlar arasında Fransa 3, Rusiya 2, Macarıstan, İspaniya və Hollandiya isə hərəyə 1 dəfə qalib olub. Kişilərdə isə Serbiya 5, Rumıniya, Sloveniya və Latviya isə hərəyə 1 dəfə çempion adını qazanıb. 

İNTİQAM Məmmədov