İngiltərə Avro-2024-ün finalında

Hollandlar başlarını tutub getdi

Almaniyada keçirilən futbol üzrə Avropa çempionatında dünən daha bir yarımfinal oyunu Dortmunddaki "Siqnal İduna Park" stadionunda baş tutub və bununla da çempionatın ikinci finalçısı da müəyyənləşib. Bu xoşbəxtlik həmin oyunda  Hollandiya millisini 2:1 hesabla məğlub edən İngiltərə millisinə nəsib olub. Maraqlıdır ki, Britaniyalılar bu dəfə də qələbəni matçın əlavə vaxtında qazanıblar.

Vurulan qollara gəlincə, matçın 7-ci dəqiqəsində hollandiyalı gənc forvard Xavi Simons dünyanın ən güclü müdafiəçilərindən biri olan Deklan Raysi keçərək topu İngiltərənin qapısından keçirməklə hesabı erkən açıb - 1:0. 

İngiltərə millisi cavab qolu vurmaq üçün çox gözləməyib. Matçın 18-ci dəqiqəsində komandanın kapitanı Harri Keyn penaltı zərbəsi ilə pozulmuş statusu bərpa edib - 1:1.

81-ci dəqiqədə ingilislər yenidən qol sevinci yaşayıblar. Ancaq Sakanin vurduğu qolu hakimlər oyundan kənar vəziyyət kimi dəyərləndirərək qeydə almayıblar. 

Bununla belə ingilislər matçda son nöqtəni qoymağı bacarıblar. +90+1 dəqiqədə Koul Palmerin ötürməsinı "Aston Villa"nin forvardi, az öncə Harri Keyni əvəzləyən Olli Uotkins qola çevirib. 

Bununla da İki gün öncə finala yüksələn İspaniyanın rəqibi İngiltərə millisi olub.

İndi futbol azarkeşlərini qarşıda möhtəşəm bir final gözləyir. Bu finalı İspaniya millisinin Avro-2024-də tarix yazan 16 yaşlı forvardi Lamin Yamalla ingiltərəli 19 yaşlı Cud Bellinqemin qarşılaşması kimi dəyərləndirirlər.

İNTİQAM Məmmədov