Türkiyə millisi Avro-2024-lə 1/4-də vidalaşıb

Almaniyada futbol üzrə keçirilən Avropa çempionatında (Avro-2024) dünən baş tutan iki  oyunla 1/4-də final mərhələsinə yekun vurulub və bunula da bütün yarımfinalçılar müəyyənləşib. Bizlər üçün maraqlı olan oyunlardan biri Berlindəki "Olimpiastadion"da keçirilib. Söhbət 1:2 hesabla bitən Türkiyə - Hollandiya matçından gedir. Oyunda ilk qol sevincini yaşayan Türkiyənin ay-ulduzlu millisi olsa da sonda meydanı qələbə ilə tərk edən və çempionatın yarımfinalına yüksələn narincilar olub.

Türkiyə prezidenti Rəcəb Tayyib Ərdoğanın öz xanımı ilə izlədiyi həmin oyunun 35-ci dəqiqəsində Arda Gülərin künc zərbəsindən ötürdüyü topu Akaydin baş zərbəsi ilə hollandlarin qapısından keçirməklə hesabı açıb - 1:0. İlk yarı bu hesabla bitib. Məqlubiyyətlə barışmayan zambaqlar ölkəsinin təmsilçiləri fəallığı artırmaqla ay-ulduzluların qapısı ağzında ard-arda təhlükəli vəziyyət yaradıblar. Nəhayət ki, 70-ci dəqiqədə Stefan de Vrey Memfesin ötürməsinı dəqiq baş zərbəsi ilə Mert Gunokun qoruğu qapıdan keçirərək pozulmuş statusu bərpa edib -1:1. Matçın 76-ci dəqiqəsində isə türkiyəli Mərt Meldyerin avtoqolu sayəsində Hollandiya millisi hesabda irəli çıxıb - 1:2. Bundan sonra türkiyəli futbolçular rəqib qapısına təzyiqi artırsalar da, məqlubiyyətdən yaxa qurtara bilməyiblər. Nəticədə Türkiyə millisi Avro-2024- ün 1/4 finalında mübarizəni dayandırıb. Hollandiya komandası isə adını çempionatın yarımfinalına yazdırıb. 

Matçda diqqət çəkən məqamlardan biri oyun öncəsi Türkiyənin dövlət himni səslənən zaman tribunalarda olan türkiyəli azarkeşlərin kütləvi surətdə türklərin simvolu olan "bozqurd" işarəsini nümayiş etdirmələri olub.

Dünən 1/4 final mərhələsində keçirilən digər oyunda isə İngiltərə millisi İsveçrəni məqlub edib. Əsas və əlavə vaxtında qalibi aşkar edilməyən (1:1) həmin oyunda britaniyalılar yalnız penaltilər seriyasında üstün olublar - 5:3. Bununla da İngiltərə millisi yarımfinala yüksəlib.

Yarımfinal oyunları 9-10 iyul günlərində keçiriləcək.

9 iyulda yarımfinal çərçivəsində İspaniya - Fransa, ertəsi gün isə Hollandiya - İngiltərə oyunu olacaq. Hər iki oyun saat 22:00-da başlayacaq.

İyulun 14-də isə Avro-2024-də Berlində keçiriləcək final oyunu ilə yekun vurulacaq.

İNTİQAM Məmmədov