Bəybala Mirzəyev: 

"Missiya"...

Mən bu yazıda çoxlu dırnaqarası sözlərdən istifadə edəcəyəm. Xüsusən də Ermənistanla sərhəddən durbinlərlə hər gün ərazilərimizə boylanan avropalı "mülki missiya" üzvlərini istisnasız olaraq dırnaq arasında təqdim etməyə məcburuq.

Emmanuel Makronun "dirijor" çubuğunun işarəsi ilə oturub duran Avropa İttifaqı (Aİ) hər 4-5 aydan bir Ermənistandakı “mülki missiya” üzvlərinin sayını yavaş-yavaş artırır. İndi də sözügedən heyətin tərkibini 50 faiz artırmağı qərara alıblar.

Belə ki, rəsmi Parisdən göstəriş alan Aİ ölkələrinin Xarici işlər nazirləri Şurasının toplantısında bu birliyin Ermənistandakı “mülki missiya"sının üzvlərinin sayını 50% - 138 nəfərdən 209 nəfərə qədər artırmaq qərarı verilib.

Bu barədə danışan Aİ-nin xarici siyasət idarəsinin rəhbəri Jozep Borrell Aİ xarici işlər nazirlərinin görüşünün yekunlarına dair mətbuat konfransında bildirib ki, “Aİ Şurası oradakı mövcudluğumuzu 138 nəfərdən 209-a çatdırmaqla Ermənistandakı mülki missiyamızı gücləndirmək qərarına gəlib. Bu, missiyanın sayının mühüm artımıdır və Ermənistanın Azərbaycanla beynəlxalq sərhədinin sabitliyini gücləndirmək üçün bir yoldur”.

Əsl həqiqətdə isə onların başlıca məqsədi heç də Ermənistanın təhlükəsizliyini təmin etmək deyil. Bu, sadəcə blefdir və görüntü yaratmaqdır.

Onların əsas məqsədləri aşağıdakılardır:

-Rusiya ermənilərin etimadını yavaş-yavaş itirdikcə, fürsətdən istifadə edib Avropa İttifaqının bölgədə fiziki varlığının genişləndirilməsi.

-Ermənistanda qərbyönümlü əhval-ruhiyyənin gücləndirilməsinə impuls verilməsi.

-Bir müddətdən sonra Ermənistanın sərhədlərini qoruyan Rusiya hərbçilərinin Avropa İttifaqının sərhəd-mühafizə missiyası ilə əvəzlənməsi.

-2025-ci ildə bölgəni tərk etməli olan Rusiya sülhməramlı kontingentinin beynəlxalq sülhməramlı qüvvələri ilə əvəzlənməsi üçün zəmin hazırlamaq.

Odur ki, 2022-ci ildə vur-tut 50 nəfərlə fəaliyyətə başlayan Aİ-nin "mülki missiya"sını yaxın gələcəkdə 1500-2000 nəfərə qədər artırmağı planlaşdırırlar (yəni ki, ən azından Rusiya sülhməramlılarının sayı qədər).

Lakin əyinlərinə üzərində Avropa İtifaqının (Aİ) rəmzlərinin təsvir olunduğu mavi gödəkçələr geyinən dırnaqarası "mülki missiya" üzvlərinin əsl həqiqətdə isə heç biri mülki şəxs, adi müşahidəçi deyil. Onların hamısı peşəkar hərbçi, diversant və kəşfiyyatçılardır.

Və onların sayının müxtəlif bəhanələrlə get-gedə artırılmasının özü də qeyri-qanunidir. Belə ki, Aİ-nin Ermənistandakı monitorinq missiyası ilə bağlı ilkin vədlərə əməl olunmayıb, anlaşma pozulub və hazırda mandat özbaşına genişləndirilir.

Üstəgəl, Ermənistanı müxtəlif vasitələrlə, müxtəlif yollarla silahlandırmağa çalışan qüvvələr bunu həm də Aİ vasitəsilə həyata keçirməyə çalışırlar.

Təsəvvür edin, bu "missiya", regionda sabitliyə və Ermənistanla Azərbaycan arasında etimada töhfə vermək məqsədi güddüyünü və guya, “tərəfsiz, neytral vasitəçi” olduğunu bəyan etdiyi halda, Ermənistanın silahlandırılmasında, militarist dövlətə çevrilməsində birbaşa iştirak edir.

Başqa sözlə desək, bu dırnaqarası “neytral vasitəçi” tərəflərin birini digərinə qarşı silahlandırır.

Bu cür əcaib vasitəçilik və saxta neytrallıq anlayışı yalnız və yalnız bəşəriyyəti iki dəfə dünya müharibəsinin ağuşuna sürükləmiş "mədəni, sivil" Avropadan törəyə bilər.

Görünən budur ki, Avropa İtifaqının məqsədi heç də sözdə bəyan etdiyi kimi regionda sabitliyə və Ermənistanla Azərbaycan arasında etimada töhfə vermək deyil.

P.S.

Aysberqin görünməyən tərəfini isə Avropa İtifaqının baş diplomatı Jozep Borrel çıxışlarından birində belə açıqlayıb: "Bu missiya Avropa İttifaqının Cənubi Qafqazdakı proseslərə cəlb olunmasının yeni mərhələsidir".

"Mülki missiya"nın üzvlərinin yağışdan sonra göbələk kimi birdən-birə 50 faiz artmasının da səbəbi elə budur.