Nəriman Qasımoğlunun Qasım Qasımzadə ilə bağlı xatirələri

N.Gəncəlinin kitabından Q.Qasımzadəyə həsr edilmiş şeirin surəti;

Q.Qasımzadə N.Gəncəli ilə “Avropa boyu” səyahətdə, Qahirə, 1956-cı il.

NOVRUZ GƏNCƏLİ

Yadıma düşdü

şair Qasım Qasımzadəyə

A dostum, yenə də sizin kəndiniz,

Səhərin sazağı yadıma düşdü.

İsti ev, bayırda qar, soyuq günəş...

Qışın oğlan çağı yadıma düşdü.

Kim gözəl ovçudur? (Gəlməyək gözə!)

Qardaşın Muxtarla gəldik söz-sözə.

Xansuvar əminin bu zaman bizə

Tüfəng uzatmağı yadıma düşdü.

Bizim bəxtimizdən açıqdı hava,

Durub Muxtar ilə yollandıq ova,

Quşların, kollardan biz qova-qova

Hey qanad açmağı yadıma düşdü.

Bəli, dərələri gəzdi bu zaman

Əlləri tüfəngli iki qəhrəman.

Qaldırdım silahı, açmamış nişan

Dovşanın qaçmağı yadıma düşdü.

Qamışlıq içində dolaşdıq qoşa,

Muxtarın tüfəngi açıldı boşa,

Diksinib eylədim ona tamaşa,

Turacın uçmağı yadıma düşdü.

O gün kor-peşiman qayıtdıq geri,

Axdı alnımızdan xəcalət təri.

Atan baxdı-baxdı, güldü gözləri,

Asta söz atmağı yadıma düşdü:

“Gözəl ovçusunuz”, şair nəğmə qoş,

Anıb keçən günü aşıq kimi coş,

İki mərd ovçunun əlləri bomboş

Evə qayıtmağı yadıma düşdü.

(Sözüm tükənməmiş sinəmdə hələ,

Saxladım şerimi mən bilə-bilə,

Vurğunun qoşması bu rədif ilə

Ruhu oyatmağı yadıma düşdü.)

1956