Kişi və qadın basketbol yığmamız AK-nın final mərhələsinə vəsiqə qazanıb

Komandalarımız AK təsnifat turnirinin qalibi olub

8-9 iyun günlərində Priştinedə (Kosovo) kişi və qadınlar arasında 3x3 basketbolu üzrə Avropa Kubokunun təsnifat mərhələsinin qrup oyunları keçirilib. Hər iki turnirdə Azərbaycan yığması iştirak edib. Maraqlıdır ki, həm kişi, həm də qadın yiqmamiz turnirin qalibi adını qazanmaqla Avropa Kubokunun 22-25 avqust günlərində Vyanada (Avstriya) keçiləcək həlledici final mərhələsinə vəsiqə əldə edib.

Qeyd edək ki, heyətində Dina Ulyanova, Tatyana Deniskina, Aleksandra Mollenxauer və Mersedes Uolkerin cəmləşdiyi qadın yığmamız qrupda Lüksemburqu (21:8) və Maltanı (17:14) məqlub edərək yarımfinala yüksəlib. Burada Maltanı (15:10) yenidən məğlub edən qadın komandamız finalda isə Kipri əzib - 21:12.

Heyəti Cordan Devis, Amil Həmzəyev, Cəbrayıl Əkbərov və Endar Poladxanlidan ibarət olan kişi yığmamıza gəlincə, qrupun startında Ermənistanı darmadağın (21:9) edən Azərbaycan yığması ardınca Albaniya (21:13), Kosovo (14:10) və Kipri (21:16) məqlubiyyətə uğradaraq yarımfinala yüksəlib və burada İrlandiyanı (21:12), həlledici final matçında isə yenidən Kipri (20:18) məğlub edib.

Beləliklə də, finalda Kipr komandalarını üstələyən hər iki komandamız AK-ninn Vyanada keçiriləcək final mərhələsinə vəsiqə qazanıb.

İNTİQAM Məmmədov