Avro-2024 - irqçilik fonunda çempionat

Çempionat ərəfəsində Almaniya dövlət televiziyasının sorğusuna qatılan almanların 21 faizi milli Almaniyada daha çox “açıq dərili” futbolçu görmək istədiklərini bildirib.

Almaniya irqçilik iddiaları fonunda 2024-cü il Avropa Futbol Çempionatına ev sahibliyi etməyə hazırlaşır.

Avro 2024 iyunun 14-dən iyulun 14-dək Almaniya şəhərlərindəki stadionlarda keçiriləcək.

Çempionat ərəfəsində Almaniya dövlət televiziyasının sorğusuna qatılan almanların 21 faizi milli Almaniyada daha çox “açıq dərili” futbolçu görmək istədiklərini bildirib. 65 faiz isə bu bəyanatla “razı olmadığını” bildirib.

Respondentlərin beşdə biri Almaniya millisində daha çox “ağ oyunçu” görmək arzusunu ifadə edib, iştirakçıların 17 faizi isə komandanın kapitanı İlkay Gündoğanın türk əsilli olmasının “qıcıqlandığını” bildirib.

Qərbi Almaniya Radio və Televiziya Korporasiyasının (WDR) "Sport Inside" proqramının keçirdiyi televiziya sorğusunun nəticələri beynəlxalq ictimaiyyətin kəskin reaksiyasına səbəb olub.

Sorğunun nəticələri Almaniya komandasının üzvləri, o cümlədən baş məşqçi Julian Nagelsmann tərəfindən hiddətlə qarşılanıb.

Ukrayna millisi ilə yoldaşlıq görüşündən əvvəl Nagelsmann televiziya jurnalistlərinin verdiyi sualı tənqid edib. “Düşünürəm ki, ictimai televiziyada belə bir sual vermək dəlilikdir. Mən şokdayam”, - deyə o bildirib.

Mütəxəssis ümid etdiyini bildirib ki, gələcəkdə “belə absurd sorğular keçirilməyəcək”.

Almaniya millisi Joshua Kimmich də sorğunu tənqid edərək, bu cür hərəkətləri "sırf irqçilik" adlandırıb.

İdmançı futbolun müxtəlif millətlərin və dinlərin nümayəndələrini birləşdirdiyini vurğulayıb.

WDR-nin "Birlik, Ədalət və Müxtəliflik: İrqçilik və Milli Komanda Üzvlüyü Arasında" sənədli filmi idmanda, xüsusən də Almaniya milli futbol komandasında irqçiliyə işıq salır.

Film öz oyunu ilə komandanın uğuruna töhfə verən əcnəbi əsilli futbolçuların üzləşdiyi təcrid və irqçi davranışı təsvir edir.

Aparıcı Filip Awunu-nun sənədli filmdəki ifadəsi - "Almaniya üçün qürurla oynayan, eyni zamanda bütün Almaniyanın qürur duymadığı bir komanda" - ölkənin ifrat sağdakı mövqeyini əks etdirir.

Sənədli filmdə Conatan Ta və Cerald Asamoa kimi futbolçuların, eləcə də akademiklərin, jurnalistlərin və siyasətçilərin fikirləri yer alıb.

Filmdə yaşlı bir alman “əsl almanları” açıq dərililər kimi təyin edir, digər respondent isə “vətəndaşlıq insanı əsl alman etmir” deyir.

Filmdə həmçinin matçların birində Cerald Asamoa qarşı baş vermiş irqi motivli insidentin görüntüləri də var.

Filmdə 2018-ci ildə Türkiyə prezidenti Rəcəb Tayyib Ərdoğanla çəkdirdiyi fotoya görə türk əsilli Almaniya millisinin keçmiş futbolçusu Məsut Özilin üzləşdiyi irqçi hücumlara da diqqət yetirilir. Bu hadisədən sonra Özilin komandanı tərk etmək qərarına və qeyd olunan hadisələr zamanı yaşadığı mənfi təcrübəyə işarə edir.