Voleybol yığmalarımız bu gün QAL-ın üçüncü turuna başlayacaqlar 

Bu gün kişi və qadın voleybolçuların mübarizə apardığı və Azərbaycan komandalarının da iştirak etdiyi Qızıl Avropa Liqasının üçüncü turuna (mərhələ yarışı) start veriləcək. Qeyd edək ki, baş məşqçisi təcrübəli mütəxəssis Faiq Qarayev olan qadın yığmamız son mərhələ yarışını doğma divalar arasında keçirəcək. Yığmamız Bakı Voleybol Mərkəzində Estoniya (31 may, saat 18:00) və Avstriya (2 iyun saat 18:00) millisinə qarşı oynayacaq. 

Xatırladaq ki, yığmamız geridə qalan iki turda (mərhələdə) 4 oyun keçirib. Onlardan yalnız Xorvatiyanı 3:0 hesabla udan yığmamız ardından Slovakiya, Rumıniya və İsveçə 0:3 hesabı ilə uduzub.Reqlamentə görə 12 komandanın mübarizə apardığı bu turnirdə 6 oyundan sonra ən yaxşı 4 komanda "dördlər finalı"nda mübarizəni davam etdirmək hüququ qazanmış olacaq. Yeri gəlmişkən  geridə qalan 4 oyundan sonra Azərbaycan 3 xalla 10-cu yerdədir. Yığmamız yalnız  Avstriya və Estoniya millisini geridə qoyub. 

Fərid Cəlilovun başçılıq etdiyi kişi voleybol yığmamız isə son turun oyunların Estoniyada keçirəcək. Rəqiblər isə ev sahibi və Lüksemburq olacaq. Qadın yığmamızdan fərqli ilaraq, kişi komandamız 4 oyundan sonra sıfır xalla 12 komanda arasında 12-cidir.

Bu gün komandamız Estoniyada ilk matçını saat 19:00-da üv sahibinə qarşı keçirəcək. İyunun 1-də isə Lüksemburqla son matçına çıxacaq. 

İNTİQAM Məmmədov