Üzeyir Cəfərov: 

ANA itkisinin nə olduğunu izah etməyə ehtiyac yoxdur

Əziz və dəyərli dostlar!

Anam Sərvər Yaqub qızının dünyasını dəyişməsi ilə bağlı ailəmizə üz vermiş ağır itkidən dolayı mayın 12-dən bu günə kimi saysız-hesabsız zənglər və şərhlər gəlməkdə davam edir. Hər birinizə minnətdaram və təşəkkür edirəm. Məncə ANA itkisinin nə olduğunu izah etməyə ehtiyac yoxdur. ANANIN YAŞI OLMUR. Mən də o itkidən çox dərin sarsıntı və ağrılar keçirməkdə davam edirəm. Həm də o ANA 2 oğul və 4 qız övladını bu dünyaya rəhmətlik atam Eldar kişi ilə bərabər gətirməklə çox böyük əziyyətlər və çətinliklərlə bizi böyüdüb başa çatdırmışdılar. Hər ikisi çox sadə zəhmət adamı olublar. Həm 2014-cü ildə atamı, həm də mayın 12-də anamı itirəndə onların necə böyük VAR-DÖVLƏT, bənzərsiz SƏRVƏT sahibi olduqlarını bir daha anladım. O var dövlətin, sərvətin adı EL-OBA, halal, dürüst tərbiyyə verdikləri övladları, artıq özlərinin də ailə-uşaqları olan nəvələri, nəticələri və onlara layiq olduğu qiyməti göstərən XALQI,MİLLƏTİ VƏ DÖVLƏTİ.

Doğrudan da mənim valideynlərim xoşbaxt insanlar olublar ki, onlar sağlıqlarında bu VAR-DÖVLƏTİ, bu HÖRMƏTİ qazanıb gediblər. Həm atasız qalanda, həm də indi anamı itirəndə Siz dəyərli dostların, qardaşların, ağbirçək xanımların və ağsaqqal nuranı kişilərin, şəxsən tanıdığım və həyatda heç vaxt rastlaşmadığım, ancaq virtual ünsiyyətdə olduğum minlərlə, bir neçə min insanın ürəkdən yazdıqlarınız dərin kədər hisslərini mənə, ailə üzvlərimizə yönəlik baş sağlıqlarınız məni çox sevindirdi. Qəribə görünsə də, mən həm körpə uşaq kimi anamın son anlarından tutmuş dünən məzarına baş çəkən vaxta kimi hönkürtü ilə ürəkdən ağlamışam və bu sətirləri də göz yaşları içində yazıram. Bunu bu acını yaşayan dostlar daha yaxşı başa düşər. Bu elə bir acı şərbətdir ki, hamı onu içməyə məhkumdur. Bir gün tez, bir gün gec. Allah gecindən versin, əziz dostlar! Amma, biz 6 övladının, nəvə və nəticələrinin ən böyük arzularımızdan biri o idi ki, əziz ANAMIZ əzab-əziyyətsiz o haqq dünyasına, atamıza, özünün ömür gün yoldaşına qovuşsun. Ölümdən qorxmaq lazım deyil. Bir gün gələn, bir gün mütləq getməlidir və gedir. 3 gün ərzində o öz arzusuna çatdı. Atamdan sonra Bakıda öz doğma övladlarına sığınan anamız hiss edirdi və bizi məcbur etdi ki, məni öz evimə aparın... Və biz onun arzusuna uyğun olaraq atamızın vəfatından sonra 10 ildən çox yaşadığı Bakıdan kəndimizə apardıq və o 3 gün, 2 gecə hamımızla bir bir halallaşdı. Əziz dostlar. İnsan dünyadan köçməzdən əvvəl sanki dirilir, yaddaşı təzələnir. Anam da huşu başında hamımızla sağollaşdı və "Nalal edin əziz balalarım sözləri ilə bizimlə vidalaşdı...Uzaq Naxçıvandan, Gədəbəydən, Sumqayıtdan, İsmayıllıdan, Lahıcdan, Bərdədən .... Bakıdan gələnlər doğmalar və əzizlər də hamısı onunla sağollaşdıq... Ruhun şad, məkanın cənnət olsun əziz və zəhmətkeş Sərvər ANAM!! Mən çox sevinirəm ki, Sənin kimi ləyaqətli bir zəhmətkeş ANANIN oğluyam. Dostların həm dəfn mərasimində, həm məclisində, indi də dünəndən oxumağa başladığım saysız-hesabsız ürək sözlərindən, baş sağlıqlarından qürürlanıram ki, siz bizi doğru-düzgün tərbiyyə etmisiniz, haqq yolunda olmağı necə öyrətmişdinizsə, biz də o YOLU gedirik və sizin kimi də sona qədər gedəcəyik.

Bu ağır dəqiqələrdə və günlərdə yanımızda olan, mənəvi dəstək olan hər kəsə sonsuz minnətdarlığımızı bildirirk. Qafqaz Müsəlmanları İdarəsinin Cənub bölgəsi üzrə səlahiyyətli nümayəndəsi əziz dostum və qardaşım Hacı Sədi Axundzadəyə, Milli Məclisin şəxsi dostluğumda olan bir qrup deputatlarına, Dövlət Sərhəd Xidmətinin (DSX) həm Mərkəzi Apparatının, həmçinin DSX Akademiyasının bütün şəxsi heyətinə, Müdafiə Nazirliyinin çoxsaylı general və rəhbər şəxslərinə, Hərbi Prokurorluğun əməkdaşlarına, Ombudsman Aparatındakı dostlara, bəzi fəaliyyətdə olan dövlət və hökumət nümayəndələrinə, xüsusən əməkdaşlıq etdiyim Moderator az saytının bütün kollektivinə, verlişlərinə dəvət aldığım bütün TV kanalların rəhbər şəxslərinə, dəyərli və əziz aparıcı jurnalistlərə, sevimli dostlarıma və həmkarlarıma, ehtiyatda və istefada olan zabit, gizir və MAXE, əsgər dostlarıma, kimi unutdumsa məni bağışlayar, hər birinizə minnətdaram. Var olun. Allah hər birinizdən razı olsun. Allahdan Şəhidlərimiz başda olmaqla sizlərin də dünyadan köçən bütün doğma və əzizlərinizə rəhmət diləyirəm. Ruhları şad, məkanları cənnət olsun.

Dostlar, əzizlərim, anamın hüzr mərasimi Lənkəranda keçirildiyindən, həm də yol uzaq olduğuna görə- 270-300 kilometr məsafəya yaxın, mən dostlardan xahiş etdim ki, narahat olmasınlar. İnşallah, yaxın günlərdə, bütün ailə üzvlərimiz Bakıda toplaşaraq bir qərar verəcəyik. Mərasim təşkil etmək və onu layiqincə keçirmək asan məsələ deyil. İnşallah, anamın 40 mərasimi iyun ayının 20-də Lənkəranda keçiriləcək. O vaxta kimi isə biz Bakı şəhərində bir məclis təşkil etmək niyyətindəyik. Sadəcə, qeyd etdiyim kimi, ailə üzvlərimiz bir yerə toplaşmalı təxmini neçə nəfər iş yoldaşı, qonum-qonşu, dost-tanış və sairə texniki məsələlər dəqiqləşməlidir. İnşallah, yaxın günlərdə bu haqda mən siz əziz dostlara, tanışlara və maraqlanan hər kəsə məlumat verəcəyik.

Bir daha, bizim ANA itkisi ilə əlaqədar ailə faciəmizə şərik olan, ağrımızı,acımızı bölüşən, dərdimizə şərik olan hər kəsə minnətdarlığımı çatdırır, qarşınızda baş əyirəm. Var olun, əziz dostlarım, həmkarlarım və tanışlarım!!