Bakıda İtaliya Dizayn Günü keçirilib

Aprelin 22-də İtaliya Respublikasının Azərbaycandakı səfirliyi, İtaliya Ticarət Agentliyinin Bakı Ofisi və “ArtCloud Network International” şirkətinin birgə təşkilatçılığı ilə Heydər Əliyev Mərkəzində “İtaliya Dizayn Günü”nə həsr edilmiş tədbir keçirilmişdir.

"AzPress" İnformasiya Agentliyinin AZpressTİMES.info xəbər saytı xəbər verir ki, “Məhsuldar dəyər: inklüzivlik, innovasiya və davamlılıq - Qarabağ keyzi” olan tədbirdə Azərbaycan Respublikasının Prezidentinin köməkçisi Anar Ələkbərovla yanaşı müxtəlif dövlət və özəl təşkilatlardan olan qonaqlar, həmçinin Azərbaycanda akreditə olunmuş diplomatik korpusun nümayəndələri iştirak edirdi.

Açılış nitqi ilə çıxış edən İtaliyanın Azərbaycandakı fövqəladə və səlahiyyətli səfiri Klaudio Taffuri  İtaliya dizaynının həm yerli, həm də qlobal miqyasda davamlı gələcəyin formalaşdırılmasında mühüm rolundan bəhs etmişdir.

Tədbirdə italyan memar dizayner Dario Curatolo İtaliya dizaynının tarixi və məhsulları haqqında ümumi məlumat vermişdir. Daha sonra "Art Cloud Network International" kreativ icraçı direktoru və fotoqraf Fabrizio Conti Ağdam şəhəri haqqında hazırladığı video reportajını təqdim etmişdir. Video reportajda Ağdamın işğal dövründə ermənilərin törətdiyi dağıntıları, tarixi abidələrimizin pis vəziyyətə salınması haqqında danışılır. O könüllü olaraq Ağdama gəlmiş və bu hadisələri dünyaya tanıtmaq üçün çalışmışdır.

Tədbirin sonunda “Sintex” şirkətlər qrupunun təşkilatçılığı ilə “Made in Italy” moda nümayişi təşkil olunmuşdur.

Günel Sadıxova