Ölkə çempionu "Sabah" çempionatın debütantını məğlub edib

Bu gün kişi basketol klublarının mubarizə apardığı Azərbaycan Basketbol Liqasının (ABL) müntəzəm çempionatında sayca 18-ci olan son tura start verilib. "Sərhədçi" idman arenasında baş tutan görüşdə ölkə çempionu adını daşıyan "Sabah"la çempionatın debütantı olan "Xəzri" qarşılaşıb. Oyun çempionun 12 xal üstünlüyü ilə başa çatıb - 77:65 (19:19, 20:11, 18:25, 20:10).  Matçın ən yaxşı oyunçusu adına isə 15 xal və 13 podborla diqqəti çəkən Artems Butyankovs ("Sabah") layiq görülüb.

Bu qələbədən sonra aktivindəki xalların sayını 33-ə çatdıran "Sabah" bütün rəqibləri üçün əlçatmaz olub. Bununla da hazırkı ölkə çempionu yenə də müntəzəm çempionatın birinci mərhələsinin qalibi kimi diqqəti çəkib.

Ümumiyyətlə, son turda qalan oyunların nəticəsindən asılı olmayaraq, "Sabah" və "NTD-İndiqo" (Xaçmaz) çempionluq uğrunda mübarizəni yarımfinaldan, "Xəzri", "Xırdalan", "Neftçi" və "Sərhədçi" isə 1/4 finaldan davam edəcəklər.

18-ci turun digər oyunlarının təqvimi belədir:

Aprelin 25-də "Xırdalan"-"Cəlilabad" ("Sərhədçi" idman arena, saat 19:30) görüşü olacaq. Ertəsi gün eyni məkanda saat 19:30-da "Sərhədçi"-"Neftçi" oyunu başlayacaq. Aprelin 27-də saat 24:00-da Gəncə OİK-də "Gəncə'-"Sumqayıt", aprelin 28-də saat 24:00-da isə Xaçmaz OİK-də "NTD-İndiqo"-"Şəki" oyunu olacaq və bunla da müntəzəm çempionata yekun vurulacaq.

İNTİQAM Məmmədov