Bu gün aktyor Rauf Ağakişiyevin doğum günüdür

Bu gün Sumqayıt Dövlət Dram Teatrının aparıcı səhnə ustası, respublikanın Əməkdar artisti Rauf Ağakişiyevin doğum günüdür.

Rauf Ağakişiyev Mədəniyyət və İncəsənət Universitetinin dram-kino aktyorluğu fakültəsini bitirib. 1993-cü ildən Sumqayıt Dövlət Dram Teatrında əksəriyyəti baş rol olmaqla onlarla tamaşada çeşidli obrazlar yaradıb. Hər zaman teatrın yükünü məsuliyyətlə daşıyıb.

Əməkdar artist əsasən dramatik-psixoloji rollar oynasa da, komik səpgili obrazlarda da özünü sınayıb və uğura nail olub.

Rauf Ağakişiyev oynadığı rolun bütün çalarlarını hər zaman düzgün təqdim edir. İmprovizənin sərhəddini, qədərini bilir, tərəf- müqabili ilə oyun tərzini doğru müəyyənləşdirir. Obrazın mənəvi-psixoloji halı ilə fizioloji durumunun mükəmməl vəhdətini tapır.

Rauf Ağakişiyev həm də 1998-ci ildə Dərbənddə açılmış Əziz Əliyev adına Azərbaycan Dövlət Dram Teatrının səhnəsində yaddaqalan obrazlar yaradıb. İki ildən sonra yenidən doğma kollektivə qayıdıb.

Əməkdar artist Rauf Ağakişiyev bir çox bədii filmlərdə, bədii seriallarda, telaviziya tamaşalarında da biri-birindən maraqlı rollara can verib. Bədii qiraət ustası,moderator kimi də çıxışları ümumşəhər tədbirilərində maraqla qarşılanıb.

Sumqayıt Dövlət Dram Teatrı nın rəhbərliyi və kollektivi adından Əməldar artisti Rauf Ağakişiyevi təbrik edir, ona sağlam can, yaradıcılıq fəaliyyətində nailiyyətlər arzulayırıq.