Daha iki boksçumuz lisenziya turnirində qələbə qazanıb

Şəhla Allahverdiyeva birinci, Nicat Hüseynovsa ikinci qələbəsinə sevinib

Busto Arsizioda (İtaliya) kişi və qadın boksçular arasında keçirilən və Azərbaycan təmsilçilərinin də iştirak etdiyi Dünya Olimpiya təsnifatli ilk beynəlxalq turnir davam edir. 

Bu gün turnirdə daha iki təmsilçimiz - Şəhla Allahverdiyeva (66 kq) və Nicat Hüseynov (51 kq) döyüşünü qələbəylə bitirib. 1/32 finaldan mübarizəyə qatılan və ilk döyüşünə çıxan Şəhla vyetnamlı Nqok Xoanq üzərində inamlı (5:0) qələbə qazanmaqla 1/16 finala yüksəlib. Nicat Hüseynov isə ikinci döyüşünü gürcüstanlı Sahil Allahverfovini üstələyərək turnirdə ikinci qələbəsini qazanmaqla adını 1/8 finala yazdırıb. Nicat 1/8 döyüşünü martın 10-da keçirəcək.

Bu gün daha bir boksçumuz - Pekin Olimpiadasının mükafatçısı Alfonso Dominqes (92 kq) ilk döyüşünə çıxacaq. O, İsrail təmsilçisi Yan Zakon ilə döyüşəcək.

Yeri gəlmişkən, yığmamızın üzvlərindən Ümid Rüstəmov (57 kq), Zeynəb Rəhimova (54 kq), Tayfur Əliyev (63,5 kq) və Sərxan Əliyev (71 kq) ilk döyüşünü qələbəylə başa vuraraq, 1/16 finala yüksəlib.

Qeyd: Bu turnirdə 57 kq (qadınlar) və 60 kq (kişilər) istisna olmaqla, qalan çəkilərdə ilk 4 yerin sahibi Olimpiada-2024-ə lisenziya qazanmış olacaq. 57 kq-da yalnız finalçılar (1-2-ci yerlər), 60 kq çəkidə isə ilk 3 yeri tutanlar Paris-2024-ə lisenziya qazanacaq.

İNTİQAM Məmmədov