Mariya Stadnik Avro-2024-də mübarizəyə qatılır

Daha üç klassikimiz isə final görüşünə çıxacaq 

Fevralın 12-də Buxarestdə (Rumıniya) kişi və qadınlar arasında startı verilən və Azərbaycan güləşçilərinin də iştirak etdiyi idman güləşi üzrə Avropa çempionatı davam edir. Çempionatın bu günə təsadüf edən üçüncü günü artıq qadınlar da mübarizəyə qatılacaqlar. Qadınların yarısının ilk günü iki təmsilçimiz - dəfələrlə dünya və Avropa çempionu, Olimpiya mükafatçısı, qadın yığmamızın lideri Mariya Stadnik (50 kq) və Alena Kolesnik (57 kq) döşək üzərinə çıxaraq medallar uğrunda mübarizə aparacaq.

Bu gün həm də yunan-Romacilarin yarışına yekun vurulacaq. Qeyd edək ki, dünən bir dəst (1-1-1) medal qazanan Azərbaycan yığmasınin bu gün daha dörd medal qazanmaq şansı var. Belə ki, dünən mübarizəyə qatılan klassiklərimizdən uçu - Nihat Məmmədli (60 kq), Həsrət Cəfərov (67 kq) və Ülvi Qənizadə (72 kq) daha uğurla çıxış edərək finala yüksəlib. Bu isə ən pis halda onların gümüş medalı özlərinə təmin etməsi deməkdir. 82 kq-da çıxış edən ikiqat dünya və üçqat Avropa çempionu adını daşıyan Rafiq Hüseynov isə bu gün təsəlliverici görüşlərlə bürünc medal qazanmaqa çalışacaq. Belə olan təqdirdə yunan-Roma yığmamız Avro-2024-u 7 medalla başa vura bilər. 

İNTİQAM Məmmədov