Hindistanda da fermerlər etiraza qalxdı

Avropanı bürüyən fermerlərin etirazları Hindistanda da davam edir.

Kənd təsərrüfatı işçilərinin hərəkəti ilə əlaqədar polis təhlükəsizlik tədbirlərini gücləndirib
Hindistanın mərkəzi Pəncab, Haryana və Uttar Pradeş əyalətlərindən olan fermerlər hakimiyyətlə danışıqlardan sonra Yeni Dehliyə müavinət tələbi ilə böyük etiraz yürüşü keçirmək niyyətlərindən əl çəkməyiblər və paytaxta yürüşə başlayıblar. 

Hindistan hökumətinin nümayəndələri ilə beş saat davam edən və gecə saatlarında başa çatan görüşün nəticələri kənd təsərrüfatı işçilərini qane etməyib. Burada respublikanın Kənd Təsərrüfatı Nazirliyinin və Sənaye və Ticarət Nazirliyinin rəhbərləri Arjun Munda və Piyuş Göyal iştirak ediblər. Nəticədə müəyyən razılaşmalar əldə olunsa da, fermerlərin əsas tələbi - gələcək məhsul üçün minimum dəstək qiymətlərinə (MSP) zəmanət verən qanunun qəbulu ilə bağlı konsensus əldə olunmayıb.

Fermerlərin sözçüsü Sarvan Singh Pandher görüşdən sonra jurnalistlərə deyib: "İki il əvvəl hökumət tələblərimizin yarısını yerinə yetirəcəyinə söz vermişdi. Biz problemi sülh yolu ilə həll etmək istəyirdik. Amma hökumət qeyri-səmimidir. Onlar sadəcə vaxtımızı boş yerə sərf etmək istəyirlər".

Kənd təsərrüfatı işçilərinin hərəkəti ilə əlaqədar Yeni Dehli polisi təhlükəsizlik tədbirlərini gücləndirib. Bazar ertəsindən paytaxta giriş məhdudlaşdırılıb, onun sərhədlərində barrikadalar quraşdırılıb, traktorların keçidi qadağan edilib. Dehlinin bir sıra bölgələrində məhdudiyyətlər səbəbindən yollarda kilometrlərlə tıxac yaranıb.

Polisin əmrinə uyğun olaraq tezalışan maddələrin, eləcə də əldəqayırma silahların, kərpic və daşların daşınmasına tam qadağa qoyulub. Benzin qutuları və boş soda qablarının daşınması da qadağandır. Səsgücləndiricilərdən istifadə qadağandır.

Səlahiyyətlilər gələn aya qədər beş və ya daha çox insanın bir araya gəlməsini qadağan edib. Mobil rabitə bloklana bilər.