Cüdoçumuz Zəlim Tskayev Paris turnirinin finalında

İki gündür ki, Fransanın paytaxtı Parisdə Azərbaycan cüdoçularınin da qatıldığı "Böyük Dəbilqə" turniri keçirilir. Turnirin ikinci günü 4 təmsilçimiz - Rəşid Məmmədəliyev, İbrahim Əliyev (hər ikisi 73 kq), Səid Mollai və Zəlim Tskayev (hər ikisi 81 kq) tatamiyə çıxıb. Bu təmsilçilərimizdən yalnız Tskayev uqurla çıxış edərək finala yüksəlib. İlk iki görüşdə qələbə qazanan cüdoçumuz 1/8 finalda gürcüstanlı Nuqzar Tatalasvilini, 1/4-də rusiyalı Timur Arbuzovu, yarımfinalda isə Kanada təmsilçisi Fransua Tatye-Draponu məğlub edərək finala yüksəlib. Bu isə ən pis halda onun gümüş medalı özünə təmin etməsi deməkdir. Final görüşü axşam saatlarında olacaq.

Digər təmsilçilərimizə gəlincə, Məmmədəliyev üçüncü, Mollai ikinci, Əliyevsə start görüşündə uduzaraq, turnirlə erkən və əliboş vidalaşıb.

Xatırladaq ki, turnirin ilk günü isə iki cüdoçumuz - Əhməd Yusifov və Nazir Talıbov (hər ikisi 60 kq) fiaskoya uqrayib.

Final görüşləri axşam saatlarında keçirilməsi nəzərdə tutulan turnirə sabah yekun vurulacaq. Turnirin son günü isə daha üç təmsilçimiz mübarizəyə qatılacaq.

Yeri gəlmişkən, turnirdə hər çəkidə ilk üç yeri tutan cüdoçu aktivinə müvafiq olaraq 1000, 700 və 500 reytinq xalı yazdıracaq.

İNTİQAM Məmmədov