"Murov Az Terminal" liderliyi ələ alıb

Dünən qadın voleybol klublarının mubarizə apardığı Azərbaycan çempionatının Yüksək Liqasinda üçüncü dövrəyə start verilib. Start günü iki görüş keçirilib. Hər iki oyun Bakı Voleybol Mərkəzində baş tutub.

İlk olaraq nominal ev sahibi olan "Milli Aviasiya Akademiyası" Gəncənin eyniadlı klubunu qəbul edib. Qarşılaşma qonaq komandanın qələbəsiylə bitib - 2:3(26:24, 19:25, 15:25, 25:19, 11:15).

Günün ikinci oyununda isə yarış cədvəlinin liderlər qrupunda qonşu olan "Murov Az Terminal"la "Abşeron" qarşılaşıb. Qarşılaşma bu oyuna qədər 23 xalla yarış cədvəlində ikinci yeri tutan "Murov Az Terminal"in qələbəsi ilə başa çatıb - 3:0(25:20, 25:18, 25:22).

Bu qələbədən sonra "Murov Az Terminal" xallarının sayını 26-ya çatdırmaqla yarış cədvəlində birinci pilləyə yüksəlib.

Bu gün qadınların yarışında daha bir oyun keçiriləcək. UNEC-in idman zalında keçiriləcək oyunda "Azərreyl" "UNES"i sınaqa çəkəcək.

Komandaların turnir cədvəlində vəziyyət belədir:

"Murov Az Terminal" - 26 xal, "Azərreyl" - 24 xal, "Abşeron" - 21 xal, "Gəncə"- 15 xal, "MAA" - 10 xal, UNEC - 0 xal.

Fevralın 1-də isə kişilər arasında"Neftçi" - "Murov Az Terminal" görüşü keçiriləcək. Saat 17:00-da Bakı Voleybol Mərkəzində başlanacaq həmin görüş"CBC Sport" TV-də canlı yayımlanacaq.

İNTİQAM Məmmədov