Elcan Hacıyev Portuqaliya Qran-Prisində bürünc medal qazanıb 

Azərbaycan yığması 5 medalla Top-10-da 9-cu olub 

Yanvarın 26-da Portuqaliyanın Odivelas şəhərində kişi və qadın cüdoçular arasında startı verilən və Azərbaycan yığmasının da qatıldığı reytinq xarakterli Qran-Priyə yanvarın 28-də yekun vurulub. Qeyd edək ki, turnirin ilk iki günü biri gümüş, üçü  bürünc əyarlı olmaqla 4 medal qazanan Azərbaycan yığması turnirin son günündə daha bir bürünc medala sahib çıxıb. Sonuncu medal 90 kq-da tatamiyə çıxan təmsilçimiz Elcan Hacıyevin payına düşüb.

Xatırladaq ki, müvafiq ardıcıllıqla Avstriya, Rumıniya və Braziliya təmsilçisini məğlub edərək 1\4 finala yüksələn Hacıyev burada Cənubi Koreya təmsilçisinə məğlub olmaqla mübarizəni təsəlliverici görüşlərlə davam etdirib. Burada isə o, əvəllcə Macarıstan, ardından isə İsrail idmançısını məğlub edərək turnirin üçüncüsü olub. Təəssüflər olsun ki, onunla eyni gündə və eyni cəkidə mübarizəyə qatılan Vüqar Talıbov ikinci, +100 kq-da mübarizəyə qatılan Uşanqi Kokuari isə ilk görüşdəcə uduzaraq turnirlə erkən və əliboş vidalaşıb. 

Turnirin ilk iki günündə isə cüdoçularımızdan Yaşar Nəcəfov (66 kq) gümüş, Turan Bayramov (60 kq), Kamran Süleymanov (66 kq) və Səid Mollai (81 kq) bürünc medal qazanıb.

Beləliklə, Azərbaycan yığması Turniri 5 (0-1-4) medalla başa vurub. Bu göstərici ilə Azərbaycan yığması Braziliya, Macarıstan, Avstraliya, Estoniya, Sloveniya. Fransa, Monqolustan, İsrail və Montoneqro kimi ölkələri geridə qoyaraq Top-10-da 9-cu yeri tutub. 

Turnirdə ilk 3 yeri Yaponiya (2-2-5), Özbəkistan (2-1-0) və Türkiyə (2-1-0) bölüşüb. 

Bir məqamı da qeyd edək ki, hər çəkidə ilk 3 yeri tutan cüdoçular müvafiq olaraq, 700, 490 və 350 reytinq xalı qazanıb. Bu xalları qazanan cüdoçular İJF-nin növbəti reytinq cədvəlində mövqelərini bir qədər yaxşılaşdıracaqlar. 

İNTİQAM Məmmədov