Asif Rüstəmli: 

ÖVLADIMIN ÖVLADI - NƏVƏ

Tanımadığı dünyaya təşrif gətirdiyi, göz açdığı ilk andan qan qohumlarına ikihecalı "vəzifə" paylayır - əmi, dayı, xala, bibi, ata, ana, nənə, baba (unutduğum vəzifələr varsa əlavə edə bilərsiniz)... Sonra da papağımızı qabağımıza qoyub fikirləşirik ki, bizdə qohumbazlıq niyə bu qədər dəbdədir... Dəbdə olar də?! Müvəqqəti vəzifə vermir ki... Səlahiyyətlərin dəyərdən düşdüyü bir zamanda təmənnasız-filansız sənə ömürlük vəzifə verənin qədir-qiymətini necə bilməyəsən?

Nəvə - ailə dövlətinin monolit qarantı, əmin-amanlıq elçisi, Tanrının qanadsız mələyidir.

Nəvə - var-dövlətin, sərvətin verə bilmədiyi xoşbəxtlik hissini, bəxtiyarlıq duyğusunu, bayram əhval-ruhiyyəsini bircə təbəssümü ilə sənə yaşada bilər.

Nəvə - İlahi baxışları, xəfif gülüşləri, qutsal, həyatverici öpüşləri ilə sənə dünyanın ağrı-acılarını unutdura bilər...

Nəvə - mənim özümə qayıdışımdır.

Nəvə - ruhumdan və qanımdan süzülüb dünənimdən sabahıma boy göstərən, yol alan işıq selidir.

Nəvə - nəsillər arasında vəhdət yaradan, onları birləşdirən, bütövləşdirən, gələcəyə yönəlikli körpüdür.

Üç böyük sənətkarın - Nəriman Həsənzadə, Emin Sabitoğlu və Zeynəb Xanlarova tandeminin yaratdığ "Xoşbəxtlik" nəğməsinin nəqərat hissəsində səslənən beytində bircə sözə cüzi dəyişiklik edərək oktyabr ayının 11-də ad günü olan nəvəmə ünvanlayıram:

Sənə minnətdaram nəvəm, dünyada,

Dünyanın xoşbəxti mənəm dünyada!

Dünyamızdan - Yaşıl planetimizdən və fidan nəvələrimizdən muğayat olaq. Nüvə düyməsinə barmaq uzadanlar bir anlıq nəvə nəfəsini hiss etməyi, duymağı bacarsalar bəlkə də dünyanın nəfəsini kəsməkdən əl çəkərlər.

Dünyanın bütün babaları adından ad günü oktyabr ayının 11-də olan dünyanın bütün nəvələrini təbrik edirəm!