Bakıda Hindistanın Səfirliyi Beynəlxalq Yoqa Günü 2026-nı “Sağlam Yaşlanma üçün Yoqa” mövzusu ilə qeyd etdi +FOTOLAR

Hindistanın Azərbaycandakı Səfirliyi Beynəlxalq Yoqa Günü (IDY) 2026-nı böyük ruh yüksəkliyi və fəal iştirak şəraitində üçün xüsusi tədbir ilə qeyd etdi. Tədbirdə səfirlər, diplomatik korpusun üzvləri, yerli dövlət qurumlarının nümayəndələri, müxtəlif sahələrdən tanınmış şəxslər, Azərbaycandan olan yoqa müəllimləri və həvəskarları, eləcə də Hindistan diaspor təşkilatlarının nümayəndələri iştirak etmişlər.

Tədbir Azərbaycan Dillər Universitetinin istedadlı tələbəsi tərəfindən Sanskrit dilində Şanti Mantrasının səsləndirilməsi ilə başlamış, bu da tədbirə sakit və müsbət enerji ilə dolu bir ab-hava bəxş etmişdir. Yoqa sessiyası tanınmış azərbaycanlı yoqa təlimatçıları Elçin Quliyev və Kənan Məmmədov tərəfindən birgə aparılmışdır. Sessiya Hindistanın Ayuş Nazirliyinin himayəsi altında Hindistanın nüfuzlu yoqa ustaları tərəfindən hazırlanmış Ümumi Yoqa Protokolu əsasında keçirilmişdir. Proqrama müxtəlif yoqa asanaları, pranayama (nəfəs məşqləri) və dhyana (meditasiya) daxil edilmiş, bu da müxtəlif yaş qruplarından və təcrübə səviyyələrindən olan iştirakçıların yoqa təcrübəsinə fəal şəkildə qoşulmasına imkan yaratmışdır.

Tədbir iştirakçılarına müraciət edən Hindistanın Azərbaycandakı səfiri cənab Abhay Kumar Beynəlxalq Yoqa Gününün qlobal əhəmiyyətindən bəhs etmişdir. O qeyd etmişdir ki, bu gün 2014-cü ildə BMT Baş Assambleyası tərəfindən rekord sayda üzv dövlətin dəstəyi ilə qəbul edildikdən sonra hər il qeyd olunur. Səfir vurğulamışdır ki, kökləri Hindistanın qədim müdrikliyinə söykənən yoqa sadəcə fiziki məşq deyil, bədən və zehin arasında harmoniyanı, özünənəzarəti, şüurlu yaşam tərzini və insanın ətraf aləmlə daha dərin əlaqəsini təşviq edən bütöv bir həyat fəlsəfəsidir.

Bu ilin “Sağlam Yaşlanma üçün Yoqa” mövzusuna toxunan səfir Kumar bildirmişdir ki, dünya üzrə insanların ömür uzunluğu artdıqca, daha sağlam, fəal və dolğun həyat sürməyə diqqət yetirmək xüsusi əhəmiyyət kəsb edir. O vurğulamışdır ki, müntəzəm yoqa məşğələləri elastikliyi, tarazlığı, fiziki gücü, tənəffüs qabiliyyətini və psixoloji rifahı yaxşılaşdırır, eyni zamanda insanlarda dözümlülük, emosional sabitlik və daxili rahatlıq formalaşdırır. Səfir qeyd etmişdir ki, sağlam qocalmanın əsası sağlam həyat tərzindən başlayır və iştirakçıları uzunmüddətli fiziki və mənəvi sağlamlıq üçün yoqanı gündəlik həyatlarının ayrılmaz hissəsinə çevirməyə çağırmışdır.
Səfir Kumar Beynəlxalq Yoqa Gününün dünyanın hər yerində böyük maraqla qeyd olunduğunu və milyonlarla insanı sağlamlıq, sülh və harmoniya naminə bir araya gətirdiyini vurğulamışdır. O, Azərbaycanda yoqaya marağın artmasını onun qlobal  dəyərlərinin və mədəni, dil və coğrafi sərhədləri aşmaq qabiliyyətinin göstəricisi kimi qiymətləndirmiş, bunun xalqlar və ölkələr arasında qarşılıqlı anlaşma və dostluğun möhkəmlənməsinə töhfə verdiyini bildirmişdir.

Bir sıra iştirakçılar şəxsi təcrübələrini bölüşərək yoqanın fiziki sağlamlıqlarına, psixoloji vəziyyətlərinə və ümumi həyat keyfiyyətlərinə göstərdiyi müsbət və dəyişdirici təsirdən danışmış, yoqanın çoxsaylı faydalarını qeyd etmişlər.

Yoqa təlimatçıları Kənan Məmmədov və Elçin Quliyev də Azərbaycanda yoqanın getdikcə daha çox populyarlıq qazandığını vurğulamışlar. Onlar ölkə üzrə yoqa dərslərində və sağlam həyat tərzi proqramlarında iştirakın davamlı şəkildə artdığını, bunun isə müxtəlif yaş və sosial qruplar arasında yoqanın faydaları barədə məlumat səviyyəsinin yüksəliş göstərdiyini bildirmişlər.

Tədbir münasibətilə iştirakçılara xüsusi dizayn edilmiş Beynəlxalq Yoqa Günü köynəkləri təqdim olunmuşdur. Tədbir Hindistan mətbəxinə məxsus yüngül və təravətləndirici qəlyanaltıların təqdim edilməsi ilə yekunlaşmış, bu da iştirakçılara ünsiyyət qurmaq, sağlamlıq, dostluq və mədəni mübadilə ruhunu birlikdə qeyd etmək imkanı yaratmışdır.

Videoreportajı izləmək üçün linkə TIKLAYIN:

https://www.instagram.com/p/DZ3UHYuN-Cb/

Xeyransa İsmayılova