Ağcabədi Rayon İcra Hakimiyyətində mühüm məsələlərə dair Şura iclası keçirilib

Mayın 18-də Ağcabədi Rayon İcra Hakimiyyəti başçısı yanında Şuranın geniş tərkibli iclası keçirilib. İclasda rayon icra hakimiyyəti yanında Şuranın üzvləri, aparatın məsul əməkdaşları, inzibati ərazi dairələri üzrə nümayəndələr, bələdiyyə sədrləri, idarə və müəssisə rəhbərləri iştirak ediblər.
AZpress.AZ-ın bölgə müxbiri xəbər verir ki, tədbiri giriş sözü ilə açan rayon İcra Hakimiyyətinin başçısı Rafil Hüseynov gündəlikdə duran üç mühüm məsələ barədə məlumat verib.
Müzakirəyə çıxarılan ilk məsələ “Şəhid adının əbədiləşdirilməsi və şəhid ailələrinə edilən güzəştlər haqqında” Azərbaycan Respublikası Qanununa edilən dəyişikliklərin rayonda icra vəziyyəti ilə bağlı olub. Müharibə iştirakçıları və şəhid ailələri ilə işin təşkili sektorunun müdiri Şöhrət Orucov 2024-cü il iyulun 16-da imzalanmış müvafiq Fərmandan irəli gələn vəzifələr, həmçinin əlaqələndirmə mərkəzlərində şəhid ailələrinə və müharibə iştirakçılarına göstərilən xidmətlərin cari vəziyyəti barədə geniş məlumat verib.
Gündəliyin ikinci mühüm mövzusu kənd təsərrüfatı sahəsində görülən işlərə həsr olunub. Rayon icra hakimiyyəti başçısının müavini Toğrul Bünyatov taxıl biçininə vaxtında başlanılması, sahələrdə yanğın təhlükəsizliyinin təmin edilməsi və biçindən sonra torpaqların şumlanması istiqamətində görülən hazırlıq işlərindən danışıb. Bildirilib ki, məhsulun itkisiz toplanması və təhlükəsizlik qaydalarına riayət olunması rayonun iqtisadi göstəriciləri baxımından strateji əhəmiyyət daşıyır.
Üçüncü məsələ bələdiyyələrin hesabat dövründəki fəaliyyəti və ərazi-təşkilat məsələləri ilə bağlı olub. Rayon İcra Hakimiyyəti başçısı aparatının Ərazi-təşkilat məsələləri sektorunun baş məsləhətçisi Elvin Həsənov bələdiyyələrin fəaliyyət istiqamətləri və ictimai-siyasi məsələlər şöbəsinin bu sahədə apardığı monitorinqlərin nəticələri barədə məlumat verib.
İclasda, həmçinin yanğın təhlükəsizliyi tədbirləri və taxıl biçini zamanı texnikaya olan tələbatın qarşılanması yolları müzakirə olunub, müvafiq tövsiyələr səsləndirilib.

İclasın sonunda müzakirə edilən hər bir məsələ ilə bağlı müvafiq qərarlar qəbul olunub və aidiyyəti qurumlara konkret tapşırıqlar verilib.