Sülh Şurası Qəzza zolağındakı vəziyyətin həllində mühüm irəliləyiş əldə edib

Müsəlman dünyasının Ramazan bayramını qeyd etdiyi bu bayram dövründə beynəlxalq vasitəçilər Qəzza zolağındakı vəziyyətin həllində mühüm irəliləyişlər əldə ediblər.

Bu barədə Şuranın Qəzza zolağındakı ali nümayəndəsi Nikolay Mladenov sosial media səhifəsində məlumat verib.

"Bütün vasitəçi tərəflər dağıdılmış infrastrukturun genişmiqyaslı bərpasına, icmaların dirçəlişinə və Fələstin milli birliyinə doğru irəliləyişin, eləcə də uzun müddətdir davam edən münaqişənin danışıqlar yolu ilə həllinə qapı açan çərçivə sənədi üzərində razılığa gəliblər", - deyə o yazıb.

N. Mladenov qeyd edib ki, sənəd artıq danışıqlar masasındadır. Onun həyata keçirilməsi üçün bir fundamental şərt tələb olunur: HƏMAS-ın və Qəzzada fəaliyyət göstərən bütün silahlı qrupların heç bir qeyd-şərtsiz, istisnasız və ya qismən həll yolu olmadan tam tərksilah edilməsi. Bu, ümid mövsümüdür. Qoy Fələstin xalqının taleyini müəyyən edənlər düzgün seçim etsinlər.

Xatırladaq ki, 22 yanvarda Davosda keçirilən Dünya İqtisadi Forumu çərçivəsində Qəzza zolağında sülh prosesinin bir hissəsi olaraq yaradılmış Sülh Şurasının Nizamnaməsini 19 ölkənin nümayəndələri imzalayıblar. Vaşinqton digər dövlətlərin də təşkilata qoşulduğunu elan edib. Sülh Şurası İsrail və HƏMAS arasında Qəzzanı idarə etmək barədə razılaşma əsasında yaradılıb, lakin onun digər bölgələrdəki münaqişələrin qarşısının alınmasında və həllində də iştirak etməsi gözlənilir.