Əntiqə Qonaq: 

Jurnalist ömrü başqalarına bənzəməz

Jurnalist ömrü başqalarına bənzəməz. Bunu 45 illik peşəkar jurnalist fəaliyyətimə söykənərək deyirəm. Ən əvvəl yaradıcı insan olduğu üçün rahatlığı, dincliyi heç olmaz. Beyni daim yazacağı mövzuların deposu, üstəgəl necə yazmalı, nədən başlayıb, nədə bitirməli. Zamanı da qabaqlayanlar. Ətrafdakı insanlardan bir gün əvvəl yaşayanlar. Ən çox da qəzetçilərə aid bir ömür desək. Bəlkə də bu üzdən çoxlarının ömür yolu qısa olur. Bəzilərinə normal gəlsə də, həmkarlarına görə uzun olmayan, yorğun bir həyat hekayəsi. Ustad jurnalist, tanınmış publisist, əməkdar mədəniyyət işçisi Şakir Yaqubovun həyatına bənzər. Anadan olmasının 75 illiyinə həsr olunmuş anım tədbiri Azərbaycan Mətbuat Şurasında keçirildi. Toplantını giriş sözü ilə açan MŞ sədri Rəşad Məcid Şakir Yaqubov yaradıcılığının örnək mahiyyət daşıyan tərəflərindən söz açdı, mərhumun ömür yolunun jurnalist peşəsinə sonsuz sədaqətin nümunəsi olduğunu vurğuladı.

1951-ci ildə Astara rayonunda anadan olmuş Ş.Yaqubov 1974-cü ildən 2000-ci illərədək “Azərbaycan gəncləri”, “Kommunist” (indiki “Xalq qəzeti”), “Həyat” (indiki “Azərbaycan”), “Sirdaş”, “Səhər”, “AFFA news” və “Panorama” qəzetlərində çalışıb, həmin nəşrlərdə müxtəlif rəhbər vəzifələr tutub. Sonrakı 10 ildə isə o, Azərbaycan Respublikası Auditorlar Palatasının redaksiya-nəşriyyat şöbəsinin müdiri, “İqtisadiyyat və audit” elmi-praktik jurnalının məsul redaktoru kimi çalışıb. Dövri mətbuatda çap olunmuş onlarla dəyərli əsərin tərcüməçisi, publisistik kitabların, habelə auditə dair 35-dən çox elmi-kütləvi nəşrin redaktoru olan Ş.Yaqubovun yazıları ayrı-ayrı sənət və yaradıcılıq toplularında yayılıb və bütün bunlar ona populyarlıq qazandırıb. Bu, ustad jurnalistin sevdiyi peşəsinə həsr etdiyi ömrünün rəqəmlər və faktlarla ifadə olunan bir tərəfi. Amma onun yaradıcılığını tədqiq edən bir araşdırmaçı olarsa cildlərlə kitablar yazaraq onun gənc nəsillərə örnək ola biləcək yaradıcılığının səhifələrini bir daha vərəqləyə bilər. Və bu araşdırmalar jurnalist ixtisasına yiyələnməkdə olan gənclər üçün dərs vəsaiti olmaqla bir məktəb olar. Öyrənilməsi, tədqiq olunması, yayılması və mətbuat tarixinə yazılması olan bir məktəb. Ən əvvəl onu deyim ki, Ş. Yaqubov geniş və çoxşaxəli yaradıcılığa malik bir jurnalist olub. Onun üçün çətin mövzu, yad sahə olmayıb. Və yazdığı bütün sahələri əhatəli şəkildə, maraqlı və məzmunlu, səlist, oynaq dillə, duzlu qələmlə ifadə edə bilib. Az-az jurnalistdə rast gəlmək olar bu cür genişmiqyaslı fəaliyyətə. Daha sonra onun yazılara olduqca maraqlı və cəlbedici sərlövhə vermək qabiliyyəti. Bunu də yüzdən bir jurnalist ya bacarar, ya da ki, yox. Təhsil illərində sevimli müəllimimiz, ustad jurnalist Nəsir İmanquliyev uğurlu sərlövhənin məqalənin oxunmasında və geniş oxucu kütləsi qazanmasında mühüm əhəmiyyətindən təkrar- təkrar danışardı. Həqiqətən də eləymiş. Ş. Yaqubovun "Yaddaşımın küncündən" adlı xatirələr və anılardan ibarət kitabını vərəqlədikcə yazıların başlıqları adamı onu oxumağa vadar edir. O məqalələrin yazılmasından və dərc olunmasından illər keçsə də. "Uşaqlığımın iki obyektindən...beş xatirə", "İrəvanda hal qalmadı", "Çəkməçi akademiki nə cür sağaltdı", "Baş katibin ölüsünü necə "yuduq"", "Nağılbazın nağılbaz olmayan atası", "Qaqarinin anasını necə narazı qoyduq...", "Yaxşı kişinin yaxşılıqları", "Heydər Əliyev Brejnevi rüsvayçılıq dan qurtardı", "Həbsxanadan daha ağır cəzaya tuş olmuşdu", "Sakit ömrün sakit sonluğu", "Bizlərdən biriydi, bizim kimi deyildi", "Abırlı adamın abır saxlamağı", "Ömrün zəfəri və faciəsi", "Qüds yox, Yerusəlim", "Yazılmalı yazı", "AzərTAc-ın "C"-si", "Heç vaxt 60 yaşa çatmayacaq atamdan da, anamdan da yaşlıyam"... Bu siyahını nə qədər desən uzatmaq olar. Zənnimcə bu bir-birindən maraqlı sərlövhələrin sırasını uzandıqca uzatmaq olar. Amma bir reallıq var ki, bu məqalə başlıqları özlüyündə bir dərs vəsaiti, bir məktəbdir. Oxunulası, öyrəniləsi o qədər şey var ki... Və ata-anasından yaşlı olduğunu söyləyərək özünü gözə gətirdi bəlkə də. Yaradıcılığının ən parlaq və kamil çağında həyata əlvida dedi. Amma onun məktəbini keçənlər, ondan jurnalistika dərsi alanlar, onunla bir yerdə işləyənlər, onun zəngin və çoxşaxəli yaradıcılığına yaxından bələd olanlar anım günündə ailəsini, övladlarını tək qoymadılar.

Toplantıda çıxış edənlərdən tanınmış telejurnalist, əməkdar mədəniyyət işçisi Müsəllim Həsənov, veteran jurnalist, əməkdar mədəniyyət işçisi Qüdrət Piriyev, MŞ-nin Ahıl Jurnalistlər Məclisinin sədri, “Xalq qəzeti”nin baş redaktor müavini Tahir Aydınoğlu, MŞ-nin Ahıl Jurnalistlər Məclisinin sədr müavini, əməkdar jurnalist Əminə Yusifqızı, əməkdar jurnalist, “Vətən səsi” qəzetinin baş redaktoru Elşən Əliyev, “Xalq qəzeti”nin şöbə müdiri İmran Bədirxanlı, əməkdar jurnalist Əntiqə Qonaq, əməkdar jurnalist, “Yeni təfəkkür” qəzetinin baş redaktoru Şəmsiyyə Kərimova, tanınmış jurnalist Hikmət Sabiroğlu, veteran jurnalist Hacı Mehman Fərzullayev, əməkdar jurnalist Mahir Cavadlı, Ş.Yaqubovun tələbə yoldaşı və dostu Hüseyn Qaraşov, iş yoldaşları Svetlana Şıxəliyeva, Zemfira Ələkbərova, Sənubər Qasımova, Seymur Elsevər və başqaları çıxışlarında Ş.Yaqubovu klassik jurnalistika ənənələrinin davamçısı kimi xarakterizə etdilər. Natiqlər ustadın qələmə aldığı məqalələrin mövzu rəngarəngliyindən, janr müxtəlifliyindən söz açaraq bildiriblər ki, Ş.Yaqubov sözə dəyər verən hər kəsin səmimi və qayğıkeş dostu, həmdəmi və himayəçisi olub. Bu keyfiyyətləri, eləcə də ensiklopedik biliyi, novatorluğu və təşəbbüskarlığı onu digər həmkarlarından fərqləndirib.

Ş.Yaqubovun övladı Aysel Yaqubova atası barədə qədirbilənliklə söylənilən xoş sözlərə və dəyərli fikirlərə görə toplantı iştirakçılarına təşəkkürünü bildirib. Tədbirin sonunda xatirə şəkli çəkilib. Nurlar içində yat ustad.