JURNALİSTLƏR PREZİDENTDƏN KÖMƏK İSTƏYİR- SİYAHI

“Azərbaycan” Nəşriyyatında fəaliyyət göstərən jurnalistlər  Prezident İlham Əliyevə müraciət edərək kömək istəyirlər.

AZpressTİMES.info xatırladır ki, Müraciətdə deyilir:

“Azərbaycan Respublikasının Prezidenti möhtərəm İlham Əliyev cənablarına

“Azərbaycan” Nəşriyyatında fəaliyyət göstərən media redaksiyalarının

Baş redaktorları tərəfindən

MÜRACİƏT

Hörmətli Cənab Prezident!

Müraciət müəllifləri olaraq, öncə diqqətinizə çatdırmaq istəyirik ki, rəhbərlik etdiyimiz mətbu orqanların redaksiyaları uzun müddətdir “Azərbaycan” Nəşriyyatında icarəçi tərəf kimi fəaliyyət göstərir. Buna görə də, nəşriyyat binasının əsaslı təmirinə daha çox özümüz ehtiyac duymuşuq. Artıq bizə məlumdur ki, verdiyiniz ciddi göstərişlər əsasında binanın təmirinə başlanılmasına hazırlıq gedir. Ölkə mətbuatına ayırdığınız diqqətə görə, Sizə təşəkkür və minnətdarlığımızı çatdırmağı özümüzə borc bilirik.

Onu da qeyd etmək istəyirik ki, “Azərbaycan” Nəşriyyatı əsaslı təmirə bağlandığı üçün, burada yerləşən redaksiyalarla bağlanmış müqavilələr 1 fevral 2026-cı il tarixindən dondurulub. Bundan əlavə, redaksiyalara qısa müddət ərzində binamı  tərk etmələri barədə göstəriş verilib. Lakin bu redaksiyalar üçün alternativ yer ayrılmadığından, 40 ilədək burada fəaliyyət göstərən media vasitələrinin əməkdaşları belə ümidsiz vəziyyətə düşüblər. Bir sözlə, çıxış yolu tapmaqda çətinlik çəkirik. Məhz bu səbəbdən, məsələni 02.02.2026-cı il tarixində “Azərbaycan” Nəşriyyatı qarşısında keçirdiyimiz çoxsaylı media nümayəndələrinin toplantısında müzakirə etdik. Bu tədbirdə çıxış edərək, əlaqədar rəsmi qurumların rəhbərlərinə, xüsusən də, ölkə rəhbəri olaraq Sizə, jurnalistlərə kömək etməyi xahiş etdik. Bundan az sonra redaksiyalarla bağlı qeyd olunan problem Azərbaycan Mətbuat Şurasında müzakirə edildi. Şuranın sədri Rəşad Məcidlə görüşdə 3 vacib təklif irəli sürdük.

Təkliflərimizdə qeyd olunub ki, ölkə başçısı olaraq, Siz həmişə jurnalistlərin problemlərinin həllinə diqqət ayırmısınız. Bu, mediamızın Azərbaycan həqiqətlərini dünyaya çatdırması, eləcə də xalqımızın maarifləndirilməsi üçün böyük bir dəstək olub.

Möhtərəm Prezident!

Prezident Administrasiyasının idarəçiliyində olan “Azərbaycan” Nəşriyyatının əsaslı təmirə dayandırılmasını dəstəkləməklə, burada yerləşən redaksiyaların səmərəli fəaliyyətinə dövlət nəzarətini də vacib hesab edirik. İlk növbədə, redaksiyaların müvəqqəti olaraq alternativ binalarda yerləşdirilməsini və təmir başa çatdıqdan sonra  onların nəşriyyata qaytarılmasına zəmanət verilməsini vacib hesab edirik (Xatırladaq ki, təmirə dayandırılan nəşriyyatın binasına bitişik təmirli korpusda iyirmiyə yaxın boş otaqlar mətbuata aidiyyatı olmayan subyektlərə verilib).

Buna görə də, müzakirə zamanı verdiyimiz 3 önəmli təklifi Sizin də diqqətinizə çatdırmağı vacib hesab edirik:

– “Azərbaycan” Nəşriyyatının əsaslı təmirə dayandırılması səbəbindən, binanı tərk edən redaksiyalara alternativ binalarda müvəqqəti yerlər verilsin;

– Nəşriyyatın əsaslı təmiri başa çatdıqdan sonra, bu redaksiyaların əvvəlki iş yerlərinə qaytarılması zəmanət əsasında təmin edilsin;

– Müvəqqəti fəaliyyət üçün ayrılmış sahələrlə yanaşı, “Azərbaycan” Nəşriyyatının yenidən qurulmasından sonra icarə haqqı (İndiyədək 1 kv.m üçün 5.20 manat müəyyən olunub) mətbuatın iqtisadi imkanlarına uyğunlaşdırılsın.

Cənab Prezident!

Diqqətinizə görə əvvəlcədən təşəkkür edirik və inanırıq ki, bu problemimiz Sizin köməyinizlə həllini tapacaq:

Hörmətlə:

1. Şirin Cəfəri, (“Gundemxeber”)

2. İlqar Salmanov (“Yenixeber.org“)

3. Rövşən Qasımov, (“Millitv”)

4. Yaqub Xudiyev, (“Təhqiqat” qəzeti)

5. Sədaqət Kərimova, (“Simurq” qəzeti)

6. Rövşən Vəliyev, (“Xeberlenti.com“)

7. Həzi Hacıyev, (“Ziyalı” jurnalı)

8. İradə Saracallı, (“Bizimlider”)

9. Rasim Qafarov

10. Heydər Oğuz, (“Ovqat.com“)

11. Fikrət Abdullayev, (ETİM)

12. Məhəmməd Ərsoy (“Dia-az”)

13. Asif Mərzili, (“Təzadlar”)

14. Əliyeva R. (“Nedelya” qəzeti)

15. Şamo Nərimanoğlu, (“Açıq səma”)

16. Ləzgiyeva Telli, (“Telli sənəm”)

17. Türkan Səfərova, (“Poroqraf tv”)

18 . Rasim Sadıqov, (“Azpress.az“)

19. Nicat Mahmudov, (“Rubrika.az“)

20. Nazim Tapdıqoğlu, (“Doğrusöz”)

(Və başqaları).