Gülşən Behbud: 

Təmənnasız missiya…

Həyatını ictimai fəaliyyətə həsr etmiş insanlardan danışmaq, yazmaq, təkcə onların keçdiyi həyat yoluna işıq salmır, həm də cəmiyyətə dəyərli mesajlar ötürür. Tanınmış ictimai xadim, şair - publisist, vətəndaş cəmiyyətinin üzvü Umud Mirzəyev son 33 ildə BAMF-ın prezidenti olaraq xalqa xidmət edən, cəmiyyətə töhfələr verən ziyalı vətəndaşdır.

Onun vətəndaşlığı Qarabağ hadisələri başlayan andan özünü büruzə verməyə başlayıb. Umud müəllim yaradıcı şəxsiyyət olaraq, media fəaliyyətinin əsas istiqamətini Qarabağ həqiqətlərini dünyaya bəyan etməyə yönəltməklə misilsiz xidmətlər göstərmişdir.

O, 1992-ci ildə Beynəlxalq Avrasiya Mətbuat Fondunu (BAMF) əsasını qoymuşdur. Hazırda da sözügedən fondun prezidenti vəzifəsini icra etməkdədir. Bu fond ona bir vətəndaş kimi Azərbaycana, öz millətinə xidmət etməsi üçün zəmin yaratmışdır.

Umud müəllim 90-cı illərin əvvələrində Azərbaycanda hökm sürən fövqəladə vəziyyət fonunda xarici jurnalist və diplomatlar vasitəsiylə haqq səsimizi dünyaya çatdırmışdır. Xarici media nümayəndələrinin cəbhə bölgəsinə səfərlərini təşkil etməklə, müharibə həqiqətlərinin dünya insanına çatdırılmasında mühüm rol oynamışdır.

Hər hansı bir məsələni zamanında aydınlaşdırmalısan ki, sabah onun həlli daha asan yolla mümkün olsun. Əgər qaldırılan problem öz həllini tapırsa, qalib tərəf sənsən. Belə olan halda həm insanların gözündə yüksək status sahibi olursan, həm də təcrübə və peşəkarlığın artır.

Bu gün Azərbaycanın jurnalist və vətəndaşları daha fərqli düşünməlidirlər. Jurnalist hər şeydən əvvəl elə vətəndaş olmalıdır. Qalib ölkənin vətəndaşı olduğunu unutmamalıdır. Prezidentinə, ordusuna, əsgərinə sayğı duymalı, vətəni və xalqı yolunda xidmət göstərən hər kəsə diqqətlə, sevgiylə yanaşılmalıdır.

Elə insanlar var ki, onlar hər hansı bir missiya ilə gəlirlər dünyaya. Umud Mirzəyevin missiyası haqq-ədalət yolunda sülh-əminamanlıq şəraitində addımlamaq, dəyər vermək, dəyər göstərməkdir. Bir gün mütləq göstərilən dəyər, hansı bir formadasa, insanın özünə qayıdır.

Azərbaycan milli mətbuatının 150 illik yubileyi münasibəti ilə Beynəlxalq Avrasiya Mətbuat Fondunun prezidenti Umud Mirzəyevi təbrik edir, ona çətin və məsuliyyətli fəaliyyətində uğurlar arzu edirəm.

Azərbaycanın tanınmış ictimai xadimlərinin Umud Mirzəyev haqqında fikirləri:

BDU-nun Milli mətbuat tarixi kafedrasının müdiri Cahangir Məmmədli: "Bu uzun ömürlü həyatımda yaxşı insanlara çox rast gəlmişəm. Onların əksəriyyəti ilə öz doğmam kimi səmimi ünsiyyətdə olmuşam. Belə insanlarla ilə oturub-durmaqla, birgə fəaliyyət göstərməklə qürur duymuşam.Tanıdığım, ürəyimdə, diləyimdə qiymətləndirdiyim belə insanlar içərisində ən çox inam və hörmət bəslədiyim, sevgi ilə yanaşdıqlarım Vətənə hər kəsdən çox bağlılığı olanlardır.

Tale mənə Umud Rəhimoğlu kimi vətən qeyrəti çəkən, Azərbaycan sevgisi ilə yaşayan bir dost qismət elədi. Elə bir insan, elə bir dost ki, ondan insanı insan edən ən yaxşı keyfiyyətləri öyrənmək olar".

Tənqidçisi, publisist, filologiya elmləri doktoru, Əməkdar jurnalist

Qulu Məhərrəmli:

" Biz Umud müəllimlə uzun illər Mətbuat Şurasında təmsil olunmuşuq. Umud müəllim dəyərli insandı, Azərbaycan mətbuatının inkişafı üçün, xüsusən xarici əlaqələrinin inkişaf etdirilməsi yolunda böyük işlər görür, maraqlı layihələr həyata keçirir.

İndi Umud müəllimin rəhbərlik etdiyi Beynəlxalq Avrasiya Mətbuat Fondunun əlaqələri xeyli genişlənib. Misal üçün, “Əl-Cəzirə” kimi bir kanalla Umud müəllimin güclü əlaqələri var. 44 günlük müharibədə Umud müəllimin gördüyü işləri unutmamışıq. Müharibə həqiqətlərinin “Əl-Cəzirə”də işıqlandırılması bilavasitə onun xidmətləridi..."

Xalq şairi Ramiz Rövşən:

"Umudun üstünlüyü ondadır ki, qələm sahibi ola-ola eqoist deyil. Gördüyü işlər təkcə özü üçün deyil, xalq üçündü, hamı üçündü. Tam səmimi deyirəm, bu, şair üçün nadir xarakterdi. Bu mənada, onun gördüyü işləri çox yüksək qiymətləndirirəm. Son vaxtlar az-az görüşürük, ümid edirəm ki, bundan sonra tez-tez görüşərik".

Filologiya elmləri doktoru Almaz Ülvi : "1992-ci ilin dekabrnda Prezident aparatının mətbuat xidmətinin rəhbəri Arif Əliyev zəng elədi ki, xarici jurnalistlərlə Qarabağa gedərsənmi? Nəinki jurnalistlərlə, o çətin məqamda əsgər kimi də Qarabağa getməyə hazır idim. Razılıq verdim, 10-12 nəfərlik bir qrup şəklində yola düşdük. O zamanlar Beynəlxalq Avrasiya Mətbuat Fondu təzə yaranmışdı. Sonradan anladım ki, bu səfəri də məhz Umud müəllim təşkil edib. Gecə saat 1-də Füzulinin Aşağı Əbdürrəhmanlı kəndinə çatdıq. Gecəni Umud müəllimgilin ata evində qalası olduq. Heç yadımdan çıxmaz, atası hündür bir kişi idi, tez qonaqların ayağının altında bir qoç kəsdi. Xanım ana da çörək bişirmək üçün çır-çırpı yığmağa başladı. Baxdım ki, bir təknə çörək var. Dedim, o qədər çörək var, təzədən bişirməyə nə ehtiyaca var? Xanım ana qayıtdı ki, ayıb deyilmi, qonağın qarşısına köhnə çörəkmi qoyarlar?..

Səhər Dördlər kəndinə getdik. Dedilər, nahaq bura gəlmisiniz, kəndi ermənilər mühasirəyə alıblar. 15-20 əsgər var idi, bir də 3-4 qadın. Xülasə, vəziyyətin ağırlığını nəzərə alaraq, əsgərlər maşınımızı ağac budaqları ilə kamuflyaj elədilər, gizli yolla bizi ordan çıxardılar. Biz rayon mərkəzinə enəndə eşitdik ki, ermənilər Dördlər kəndinə hücum edib, həmin əsgərləri qətlə yetiriblər. Səfərimiz bu cür qəmli notlarla başa çatdı, ağrılı məqamlarla yaddaşımıza həkk olundu".

Bu fikirlərin hər biri, Umud Mirzəyevin insan kimi necə bütöv, ictimai xadim kimi necə təsirli və vətəndaş kimi necə prinsipial olduğunu nümayiş etdirir.

Bu gün Azərbaycan müharibədən qalib çıxmış bir ölkə kimi yeni reallıqlar qarşısındadır. Qarabağ azaddır, amma informasiya müharibəsi bitməyib. Umud Mirzəyev kimi ziyalıların əməyi, onların keçmişdə atdığı addımlar bu gün bizə yol göstərir.

O, daim vurğulayır: “Jurnalist ilk növbədə vətəndaş olmalıdır. Qalib xalqın nümayəndəsi olmaq məsuliyyətdir. Prezidentinə, ordusuna, əsgərinə sayğı duymayan media vətəndaş ola bilməz.”

Bu mesaj təkcə jurnalistlərə deyil, bütöv cəmiyyətə yönəlik bir çağırışdır .

Umud Mirzəyev Azərbaycan üçün yalnız simvolik şəxsiyyət deyil – o, həm də cəmiyyətin formalaşmasında aktiv rol oynamış, zamanın ruhuna uyğun institutlar qurmuş, həqiqətin tribunası olmuş bir ziyalıdır.

Onun adı gələcək nəsillər üçün bir örnək, BAMF isə bu örnəyin institutlaşmış simasıdır. 

Gülşən Behbud