“Aprel döyüşləri şəhidlərinin qəhrəmanlığının tərənnümü” – Masallıda tədbir

Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və "Şəhid Analarına Dəstək" İctimai Birliyinin təşkilatçılığı, Gənclərin İnkişaf və Karyera Mərkəzinin Masallı bölməsinin dəstəyi ilə "Konstitusiya və Suverenlik ili"nə həsr olunmuş “Aprel döyüşləri şəhidlərinin qəhrəmanlığının tərənnümü” adlı tədbir keçirilib.                                 
Masallı rayon Heydər Əliyev Mərkəzindəki tədbirdə rayon ictimaiyyəti, şəhid ailələri, müharibə iştirakçıları, gənclər iştirak ediblər.
Əvvəlcə Dövlət himnimiz səsləndirilib, torpaqlarımızın azadlığı uğrunda canından keçən şəhidlərimizin xatirəsi bir dəqiqəlik sükutla yad edilib.  
Sonra Aprel döyüşlərinə həsr olunmuş "Zəfər yolu" adlı videoçarx nümayiş olunub.
«Şəhid Analarına Dəstək» İctimai Birliyinin sədri, şəhid Əbdülməcid Axundovun anası Ceyran Həsənova, iki şəhid – Aprel döylərinin qəhrəmanı Nurlan Əsgərli və Vətən Müharibəsi Qəhrəmanı İntiqam Əsgərlinin anası Ziba Əsgərova, aprel döyüşlərinin şəhidi Müsfiq Orucovun anası, Zəngilan rayon 7 saylı orta məktəbin direktoru Aygün Məmmədli çıxışlarında Azərbaycan Ordusunun hərb tarixinin şanlı səhifəsi olan Aprel zəfərinin 44 günlük Vətən müharibəsindəki parlaq qələbənin, torpaqlarımızın azad olunmasının və böyük qayıdış salnaməsinin başlanğıcı  olduğunu diqqətə çatdırıblar: “Bu gün şəhidlər bizim həm niskilimiz, kədərimiz, ürək ağrımız, həm də qürur yerimiz, fəxrimizdir. Gənc nəslə şəhidlərimizi, qəhrəmanlarımızı tanıtmaq, onları vətənpərvərlik ruhunda böyütmək, torpağına bağlı, xalqına hörmət hissi ilə tərbiyə etmək isə hər bir ölkə vətəndaşının ən ümdə vəzifəsidir. Bu gün hər birimiz iftixar hissi ilə deyə bilirik: Qarabağ Azərbaycandır!”
«Şəhid Analarına Dəstək» İctimai Birliyinin sədiri Ceyran Həsənova layihənin icrasına maddi dəstək olan Qeyri-Hökumət Təşkilatlarına Dövlət Dəstəyi Agentliyinə, tədbirin keçirilməsində yaxından kömək göstərən Masallı Rayon İcra Hakimiyyətinə, Masallı rayon Heydər Əliyev Mərkəzinin əməkdaşlarına, Masallı rayon Mədəniyyət Mərkəzinə və Gənclərin İnkişaf və Karyera Mərkəzinə təşəkkürünü bildirib.
Tədbir Masallı rayon Mədəniyyət Mərkəzi solistlərinin ifa etdiyi lirik, vətənpərvər mahnılarla yekunlaşıb.

 Akif AĞAYEV