"Real" evdə "Malyorka"nı minimal hesabla üstələyib

Arda Gülən "Real"da yenə də debüt edə bilməyib 

Dünən İspaniya La Liqasında bir neçə oyunla 19-cu tura start verilib. Turun maraqlı oyunlarından biri Madrid "Real"ı ilə "Malyorka" arasında olub. "Kral klubu"nun ev oyunları keçiridiyi "Santyaqo Bernabeu" stadionunda baş tutan qarşılaşma ev sahibinin minimal hesablı qələbəsi ilə bitib. Matçın taleyini həll edən yeganə qolun müəllifi isə 78-ci dəqiqədə Antonio Ryudiqer olub. Bu qələbə sayəsində aktivindəki xalların sayını 48-ə çatdıran "Real" yarış cədvəlində yenə də birinci pillədə qalıb. Onunla eyni xal ehtiyatına malik olan "Jirona" isə ikinci pillədə qərar tutub. Cədvəldə ilk üçlüyü 18 oyundan sonra 38 xal toplayan "Barselona" tamamlayır. "Real"-ın rəqibi olan "Malyorka" isə 18 xalla 14-cüdür. 

Xatırladaq ki, "Kral klubu" növbəti matçını da doğma divarlar arasında keçirəcək. Bu dəfə isə İspaniya Kubokunun 1\16 final mərhələsində aşağı dəstədən olan "Arandino" klubunu qəbul edəcək. 

Bir məqamı da qeyd edək ki, "Real"ın italiyalı baş məşqçisi Karlo Ançelotti "Malyorka" ilə oyun öncəsi türkiyəli gənq forvard, zədəsi yenicə bərpa olan Arda Gülənin debüt etməsinə imkan verəcəyini bildirmişdi. Lakin, son anda Ançelotti bu fikrindən baz keçib. 

İNTİQAM Məmmədov