Rənglərlə danışan incəsənət qəhrəmanı

Rəssamlıq dünyasında hər bir rəngin, hər bir xəttin öz hekayəsi var. Bu hekayələri ən gözəl şəkildə ifadə edən sənətkarlardan biri də İmanova Fatma Rafail qızıdır. Onun yaradıcılığına nəzər yetirdikdə təbiətlə, insanlarla və milli dəyərlərlə qurduğu emosional əlaqəni aydın şəkildə hiss etmək mümkündür.  
İmanova Fatma 1993-cü il 10 fevral tarixində Bakı şəhərində anadan olub. Rəssamlıq istedadı onun üçün uşaqlıqdan aşkar edilən bir sədaqət yoludur desək, yanılmarıq. Hələ üç yaşı olarkən qələmə alıb təsvir etdiyi rəsm əsəri onun gələcəkdə istedadlı rəssam olacağının ilk işarələrini verib. Qızlarındaki bacarığı fərq edən valideynlərinin diqqəti və dəstəyi sayəsində o, 11 yaşında rəssamlıq dərsləri almağa başlayıb. İlk müəllimi Əməkdar Rəssam Elçin Axundov olan istedadlı qız rəssamın rəhbərliyi altında sənətin bütün sirlərinə yiyələnməyi bacarıb. Daha sonra isə o, Səttar Bəhlulzadə adına Uşaq Rəsm Studiyasında (indiki Qalereya 1969) rəssamlıq dərsləri almağa davam edib. Orada Əməkdar Rəssam Dilarə Atakişiyevadan rəssamlıq dərsləri alıb. Beləliklə istedadlı gəncin ilk qrup sərgisi 2006-cı ildə keçirilib və o vaxtdan etibarən yaradıcılığı geniş auditoriyanın diqqətini cəlb edib. Həmin ilin may ayında Üzeyir Hacıbəyovun-120 İlliyinə, Rəşid Behbudovun-90 illiyinə və "Arşın Mal Alan" filminİN 60 illiyinə həsr olunmuş "Musigi rəngləri" adlı uşaq rəsm müsabiqəsində uğurla iştirak etmişdim. İki əsərim sərgiləndi və kataloqda çap olundu. 
Fatma İmanova 2011-ci ildə Azərbaycan Dövlət Rəssamlıq Akademiyası nəzdindəki İncəsənət Kollecinə daxil olaraq Dekorativ-tədbiqi sənət və xalq sənəti ixtisasında “Xalçaçı-rəssam” fakultəsi üzrə təhsil alıb.  Diplom müdafiəsi zamanı o, “Xətai” naxışını işləyərək milli sənət ənənələrinə müasir yanaşma nümayiş etdirmişdir. 2015-ci ildə isə Azərbaycan Dövlət Rəssamlıq Akademiyasının “Muasir Rəngkarlıq” ixtisasına qəbul olunaraq təhsilini davam etdirmişdir. Diplom işi olaraq seçdiyi "Dayanacaq" adlı əsərində gündəlik həyatın sadə, lakin dərin məqamlarını – avtobus dayanacağında gözləyən insanların emosiyalarını özünəməxsus üslubda təsvir edib.  Rəssamın yaradıcılığında “Dədə Qorqud” dastanından tutmuş A.S. Puşkin kimi dahi şəxsiyyətlərin təsiri də öz əksini tapıb. Onun yaradıcılığında maraqlı məqamlar çoxdur. Bəlkə də heç düşünməzdi ki, məktəb illərində kitabda gördüyü diqqətini çəkən rəsm əsərinin müəllifi Əməkdar Rəssam Asif Azərelli sonradan onun diplom rəhbəri olacaqdı.  
İstedadlı gəncimzin iştirak etdiyi sərgilər və qazandığı mükafatlar onun sənətdəki uğurlarının gözlə görünən sübutudur. O, 2006-cı ildən etibarən bir çox müsabiqə və sərgilərdə iştirak etmiş, diplom, sertifikat və mükafatlara layiq görülmüşdür.  
Azərbaycan Rəssamlar İttifaqının üzvü olan gənc rəssam 2021-ci ildə – Prezident təqaüdünə layiq görülmüşdür. Onun əsərləri İtaliya, Ukrayna, Türkiyə, Misir kimi bir çox xarici ölkələrdə keçirilən beynəlxalq sərgilərdə nümayiş olunub.  Hal-hazırda isə Fatma İmanova təkcə yaradıcılıqla deyil, həm də rəsm müəlliməsi kimi fəaliyyət göstərir. Gənc rəssamlara təcrübələrini ötürməklə milli sənətin inkişafına dəyərli töhfələr verir.  
Fatma İmanovanın yaradıcılığı Azərbaycanın mədəni irsi ilə müasir incəsənətin harmoniya içində birləşdiyi bir sənət aləmidir. Onun fırçasından çıxan hər bir əsər, izləyicini özünəməxsus emosional səyahətə aparır.  Sənətin qüdrəti rənglərlə danışmaqdadır sənətkarlar isə bu danışığın ən gözəl tərcüməçisidir.

Ziyarət Qəhrəmanova-Cabarova
Sənətşünas,
Azərbaycan Dövlət Rəsm Qalereyasının böyük elmi işçisi, ARİ-nın Prezident təqaüdçüsü