Bəybala Mirzəyev: 

Qəzza qəssabı…

Və ya İsrail nə üçün Ərdoğanı hədəfə alıb?

Yeni il başlayar-başlamaz İsraildən Türkiyə liderinə sərt bəyanat ünvanlanıb. İsrailin Xarici İşlər Nazirliyinin başçısı bəyan edib ki, Rəcəb Tayyib Ərdoğan Türkiyə prezidenti olduğu müddətdə rəsmi Tel-Əviv Ankaradakı səfir vəzifəsinə diplomat göndərməyəcək.

Söhbət İsrailin xarici işlər naziri Eli Koenin “X” mikrobloqundakı (keçmiş Tvitter) açıqlamasından gedir.

Eli Koen konkret və açıq surətdə bəyan edib ki, “nə qədər ki, Ərdoğan Türkiyənin prezidentidir, İsrail səfirinin geri dönəcəyi yer yoxdur”.

Məsələ aydındır.

İsrailin baş naziri Benyamin Netanyahu da, onun nazirləri də Türkiyə-İsrail münasibətlərinin pozulmasının bütün günahını məhz Ərdoğanda görür.

Niyə?

Çünki Ərdoğan İsrail-HƏMAS savaşının davam etdiyi son 3 ayda Netanyahunun ünvanına dəfələrlə sərt açıqlamalar verib və onu gah “Qəzza qəssabı”, gah da “faşist” adlandıraraq Adolf Hitlerlə müqayisə edib, Netanyahu ilə Hitlerin hərəkətləri arasında heç bir fərq olmadığını bildirib.

Rəcəb Tayyib Ərdoğanın Netanyahuya “Qəzza qəssabı” deməsi İsrail rəhbərliyini ciddi şəkildə narahat edib və İsrail-Türkiyə əlaqələri qırılma nöqtəsinə çatıb.

Bəs, Türkiyə Prezidenti ilin sözü hesab edilə biləcək “Qəzza qəssabı” ifadəsini hansı motivlərdən çıxış edərək səsləndirib?

Ərdoğan görür ki, İsrail ordusunun HƏMAS-ın oktyabrın 7-də yəhudilərə qarşı törətdiyi zorakılığı, şiddəti cavablandırmaq məqsədilə elan etdiyi müharibə öz qəddarlığının miqyasına və kəmiyyətinə görə artıq bütün “qırmızı xətt”ləri ötüb keçir. İsrail hökuməti HƏMASI məhv etmək adı altında əslində bütün qəzzalılara qarşı “kollektiv cəzalandırma” siyasətini həyata keçirməkdədir.

Bəziləri İsrailin cəza əməliyyatını hətta soyqırımı kimi də qiymətləndirir. Çünki İsrail əsgərlərinin son 3 ayda Qəzzada öldürdükləri mülki fələstinlilərin sayı artıq 20 mini keçib. Onların 5 mindən çoxu məhz uşaqlardır. Hazırda Qəzzada uşaqların 80%-ə qədəri qida çatışmazlığı ilə üzləşib.

Oktyabrın 7-dən İsrailin Qəzza zolağına əks-hücumları nəticəsində həlak olan jurnalistlərin sayı 100 nəfəri keçib. Son 85 gün ərzində Qəzzada BMT-nin 136 nəfərdən çox əməkdaşı həlak olub. BMT Baş katibi Antoniu Quterreşin sözlərinə görə, bu, BMT tarixində görünməmiş haldır.

Bəli, görünən budur ki, Netanyahunun ucbatından Qəzza həqiqətən də rəsmən qəssabxanaya çevrilib. Və bu qətliamların hələlik sonu görünmür. Çünki İsrail hökuməti bəyan edib ki, Qəzzada hərbi əməliyyatlar qarşıdakı aylarda da davam edəcək.

Deməli, Ərdoğan “Qəzza qəssabı” ifadəsini işlətməkdə heç də haqsız deyil. Netanyahu bu ifadəyə görə Ərdoğanı “asıb-kəsmək” əvəzinə, günahı özündə axtarmalıdır.

Əslində Türkiyə-İsrail münasibətlərinin pozulmasının real günahkarı Ərdoğan yox, məhz Netanyahunun özüdür. Və nə qədər ki, Netanyahu hakimiyyətdədir, nə Qəzzada qırğınlar dayanacaq, nədəki Türkiyə-İsrail münasibətləri yaxşılaşacaq.

Eli Kohen də suçu Ərdoğanın üzərinə yıxmaq əvəzinə, öz liderini – Beniamin Netanyahunu, onun davakar-militarist siyasətini tənqid etməliydi.

P.S.

İsrail siyasətçilərinin heç də hamısı Netanyahu kimi aqressiv, ifrat sağçı deyil. İsraildə normal, adekvat, sülhpərvər siyasətçilərə də rast gəlmək mümkündür. Yəhudi-ərəb düşmənçiliyinə son qoyulması və bölgədə qalıcı sülhün bərqərar olması üçün məhz həmin siyasətçilərin hakimiyyətə gəlməsinə ehtiyac var. O zaman Türkiyə-İsrail münasibətləri də tezliklə normallaşacaq. Türkiyə-İsrail dostluğunun qaldığı yerdən davam etməsi hər iki tərəf üçün vacibdir.