Məhkəmədə İşxanyanın Şuşa şəhərinin işğalına dəstək verdiyini əks etdirən video görüntülər nümayiş olunub

Bu gün Bakı Hərbi Məhkəməsində davam edən məhkəmə prosesində David İşxanyanın Şuşa şəhərinin işğalının qarşısını almağa çalışan Azərbaycan hərbçilərinin irəliləməsinə necə mane olması ilə bağlı videogörüntülər nümayiş olunub.

Ermənistan tərəfinin hazırladığı videomaterialda Şuşa şəhərinin işğalının qarşısını almağa çalışan Azərbaycan hərbçilərinin Xocavənd istiqamətində irəliləməsini dayandırmaq üçün Monte Melkonyanın göstərişi ilə D.İşxanyan və onun dəstəsi yolu bağlayıb.

Videokadrlardan görünür ki, 1992-ci il mayın 15-də dəstə komandiri Armen Avakyan döyüşdə həlak olub və onun yerinə David İşxanyan təyin edilib.

Təqsirləndirilən David İşxanyan videomaterialda göstərilən faktların reallığa uyğun gəlmədiyini və videomaterialın özünün təbliğat məqsədi ilə çəkildiyini bildirib. Onun sözlərinə görə, bu film 2020-ci ilin əvvəlində Azərbaycanın bir vaxtlar işğal altında olan ərazilərində, qondarma özünü elan etmiş rejimin “parlament və prezident seçkiləri” ərəfəsində hazırlanıb: “Bunun məqsədi təbliğat idi. O vaxt mən dəyənəklə gedirdim, istəsəm də, orada fiziki iştirak edə bilmirdim”.

Qeyd edək ki, Ermənistanın hərbi təcavüzü nəticəsində sülh və bəşəriyyət əleyhinə cinayətlərdə, hərbi cinayətlərdə, o cümlədən təcavüzkar müharibənin hazırlanmasında və aparılmasında, soyqırımda, müharibə qanunlarının və adət-ənənələrinin pozulmasında, o cümlədən terrorizmdə, terrorizmi maliyyələşdirməkdə, hakimiyyəti zorakılıqla ələ keçirməkdə və digər cinayətləri saxlamaqda təqsirləndirilən Ermənistan Respublikası vətəndaşlarının məhkəmə prosesi davam edir.