Məryəm Əlizadənin 75 illik yubileyinə həsr olunmuş tədbir keçirildi

AZpress.AZ xəbər verir ki, Cəfər Cabbarlı adına Azərbaycan Dövlət Teatr Muzeyində 28  aprel 2025-ci il tarixində tanınmış teatrşünas, sənətşünaslıq doktoru, professor, Əməkdar incəsənət xadimi Məryəm Əlizadənin anadan olmasının 75 illik yubileyinə həsr olunmuş tədbir keçirildi.
Tədbiri muzeyin direktoru, Əməkdar mədəniyyət işçisi Sevinc Mikayılova giriş sözü ilə açaraq qonaqları salamladı və Məryəm xanımı yubileyi münasibətilə təbrik etdi. Ardınca tədbiri teatrşünas, sənətşünaslıq elmləri üzrə fəlsəfə doktoru, Əməkdar incəsənət xadimi Aydın Talıbzadə davam etdirdi. 
Tədbir çərçivəsində muzey əməkdaşları tərəfindən hazırlanmış, Məryəm Əlizadənin həyat və fəaliyyətini  əks etdirən videoçarx, həmçinin  rejissor, Əməkdar incəsənət xadimi Vaqif İbrahimoğlunun və Xalq yazıçısı Elçin Əfəndiyevin  müsahibələrindən videolar  nümayiş olundu.  
Tədbirə dəvət olunmuş  qonaqlardan Azərbaycan Teatr Xadimləri  İttifaqının sədri, Xalq artisti Hacı İsmayılov, Azərbaycan Dövlət Akademik Milli Dram Teatrının bədii rəhbəri, Əməkdar incəsənət xadimi  Mehriban Ələkbərzadə, yazıçı, ssenarist, dramaturq, professor, Əməkdar incəsənət xadimi  Əli Əmirli, sənətşünaslıq doktoru, professor, Əməkdar incəsənət xadimi  İsrafil İsrafilov,  Azərbaycan Dövlət Gənc Tamaşaçılar Teatrının direktoru Naidə İsmayılzadə, İrəvan Dövlət Azərbaycan Dram Teatrının direktoru, əməkdar mədəniyyət işçisi İftixar Piriyev, sənətşünaslıq üzrə fəlsəfə doktoru, dosent Vidadi Qafarov, sənətşünaslıq üzrə fəlsəfə doktoru,dosent Elçin Cəfərov, Xalq artistləri Həmidə Ömərova, Bəsti Cəfərova, Firəngiz Mütəllimova, tarzən, bəstəkar, Xalq artisti Zamiq Əliyev, Əməkdar artist Firdovsi Atakişiyev, rejissor Mahmənzər Məmmədrəsulqızı, rəssam, sənətşünaslıq üzrə fəlsəfə doktoru  Səkinə Bağırova, Məryəm Əlizadənin doğmaları Hikmət Əlizadə və Səlim Əlizadə  onunla  bağlı  öz  ürək sözlərini bölüşdülər. O cümlədən Məryəm xanım  Azərbaycan Teatr Xadimləri  İttifaqı tərəfindən Fəxri Fərmanla təltif olundu, Uluslararası Türk Kültürü Teşkilatı Türksoy tərəfindən medal və diplomla mükafatlandırıldı. Həmçinin sənətşünaslıq üzrə fəlsəfə doktoru, rəssam Səkinə Bağırova Məryəm xanımın portreti əks olunmuş xalçanı yubilyara hədiyyə etdi. 
Bundan  başqa bədii hissədə Azərbaycan Dövlət Akademik Opera və Balet Teatrının solisti, Azərbaycan Dövlət Mədəniyyət və İncəsənət Universitetinin dosenti, Xalq artisti Gülyanaq Məmmədova tarda Emil Mirzəyevin, kamançada Niyaməddin Allahverdiyevin, nağarada Yusuf  Rüstəmovun müşayiətilə xalq mahnılarından seçmələr ifa etdi.  O cümlədən  Azərbaycan Dövlət Akademik Musiqili Teatrın solistləri Əməkdar artist Nərgiz Kərimova və Fərid Əliyev konsertmeysterlər Fidan Məmmədova və Kamil Həsənovun müşayiəti ilə dahi bəstəkar Üzeyir Hacıbəylinin və maestro Niyazinin əsərlərini ifa etdilər. 

Tədbirdə mədəniyyət və incəsənət xadimləri, Azərbaycan Dövlət Mədəniyyət və İncəsənət Universitetinin əməkdaşları, muzey işçiləri, media  nümayəndələri, yubilyarın ailə üzvləri və dostları  iştirak etdilər.
Tədbirin yekununda söz yubilyara verildi.  
Sonda xatirə şəkilləri çəkildi.

Foto: Araz Məmmədov, AZpress.AZ