Beynəlxalq Muğam Mərkəzində şairə Tamilla Axundovanın yaradıcılıq gecəsi keçirilib

Martın 7-də Beynəlxalq Muğam Mərkəzində Azərbaycan, Rusiya və Moskva Yazıçılar İttifaqlarının üzvü, ali dərəcəli həkim, şair və publisist Tamilla Axundovanın yaradıcılıq gecəsi keçirilib. Tamilla Axundovanın yaradıcılıq gecəsi səhnədə poeziyanı, rəngkarlığı, musiqini və teatr sənətini bir araya gətirib. Onun poeziyasında vətənpərvərlik, təbiət mənzərələri, janr-məişət təsvirləri və müxtəlif yönlü məhəbbət-lirik mövzular zəngin bədii ifadəsini tapıb. Yaradıcılıq gecəsində bu mövzular həm müəllifin, həm də gecənin qonaqlarının ifasında səhnədən səsləndirilib. Gecə ərzində Tamilla Axundovanın sözlərinə yazılmış bir sıra musiqi əsərləri də təqdim olunub; həmin əsərlərin bəzilərinin musiqisinin müəllifi bilavasitə Tamilla xanımın özüdür. Bununla yanaşı, gecədə Azərbaycanın Xalq rəssamı Fərhad Xəlilovun əsərləri də nümayiş olunub.
Yaradıcılıq gecəsində Bakı Slavyan Universitetinin professoru, "Azərbaycanda Rus dili və ədəbiyyatı" jurnalının baş redaktoru, Respublikanın Əməkdar jurnalisti Flora Nəci; sənətşünaslıq üzrə fəlsəfə doktoru, Üzeyir Hacıbəyli adına Bakı Musiqi Akademiyasının baş müəllimi Alyona İnyakina; Azərbaycanın Əməkdar artistləri Bella Safina və Şölə Səfərəliyeva; bəstəkar və ifaçı Sevinc İbrahimova; "Yuğ" Teatrının aktrisası Günəş Tegin; Bakı Bələdiyyə Teatrının aktrisası Zülfiyyə Məmmədova; Azərbaycan Dövlət Akademik Rus Dram Teatrının rejissoru və aktrisası Fəridə Nesterenko; Azərbaycan Dövlət Akademik Musiqili Teatrının solisti, beynəlxalq müsabiqələr laureatı Yuliya Heydərova; bəstəkar və pianoçu Murad Muradov; qiraətçi Umar Qasımov; musiqiçilər – Şükufə Rəsulova, Gülnar İrşadi, Aytən Əliyeva, İntizam Qasımov, Xəyal Şərifov və Toğrul Qasımov; və tərkibinə Bəhram Xəlilov, Elşən Karaca, Şəbnəm Karaca, Təranə Vaqifqızı, Vədud Müəzzin, Qalibə Mirzəliyeva, Nuranı Nur-qiraət, Aytən Rüstəmli, İlqar Tahiri daxil olan "OCAQ" qrupu iştirak ediblər.
Tədbirin rejissoru Azərbaycan Dövlət Akademik Rus Dram Teatrının aktrisası Fəridə Nesterenko olub. Yaradıcılıq prosesinin məsləhətçisi Azərbaycanın Xalq artisti Şəfiqə Məmmədova olub. Tədbirin aparıcısı Nərgiz Cəlilova idi. Yaradıcılıq gecəsinin tərtibat və dizaynı Bəhram Xəlilov, vizual dizaynı isə Timur Əmirxanov tərəfindən hazırlanıb.

Nəriman İsmayılov