Elman Eldaroğlu: 

“Qurucu babalarımızın” qeyrətini çəkən xanım...

Hər ilin yanvar ayının 31-də ehtiram əlaməti olaraq insanlar dəstə-dəstə Məhəmməd Əmin Rəsulzadənin Novxanıdakı abidəsi önünə gəlir, respublikamızın banisinə olan məhəbbətlərini dilə gətirirlər. Bu insanların arasında müxtəlif siyasi partiyaların nümayəndələri çoxluq təşkil etsə də, heç bir siyasi məqsədi olmayan, qəlbinin səsi ilə gələnlər də az deyil. Bu gün sizə onlardan biri- professor Solmaz Rüstəmova- Töhidi haqqında söhbət açmaq istəyirəm. O, nəinki ildə bir dəfə, bəlkə də elə bir gün olmur ki, Məhəmməd Əmin Rəsulzadəni xatırlayıb xatırlatmasın və necə deyərlər, qeyrətini çəkməsin...

Doğrudur, namizədlik və doktorluq dissertasiyalarının mövzusu İranla bağlı olub, amma Azərbaycan Xalq Cümhuriyyətinin tarixini də unutmayıb. Bu istiqamətdə sanballı əsərlər yazaraq təqdim edib, Azərbaycan dövlətçiliyinə böyük xidmət göstərib...

Haqqında söhbət açdığım Solmaz Rüstəmova- Tohidi 1953-cü ildə Bakı şəhərində dünyaya gəlib. Azərbaycan Dövlət Universitetini bitirib. Tarix elmləri doktoru, professor, AMEA- nın akademik Ziya Bünyadov adına Şərqşünaslıq İnsititutunun əməkdaşı. İranın tarixi və iqtisadiyyatı şöbəsinin aparıcı elmi işçisidir.

1995-ci ildən Niderlandın Sosial Tarix İnstitutunun Qafqaz üzrə, 2010-cu ildən Qafqaz və Orta Asiya üzrə nümayəndəsidir. Azərbaycan tarixinin tədqiqi sahəsində uzunmüddətli səmərəli fəaliyyətinə görə “Əməkdar elm xadimi” fəxri adına layiq görülüb...

Xarizmatik xanımdır, özünəməxsus xüsusiyyətləri çoxdur. Polad iradəsi, çalışqanlığı ilə insanların diqqətini asanlıqla özünə çəkə bilir. Duyğusal və romantik bir xarekterə malikdir. İntuisiyası güclüdür. Gözəlliyin aşiqidir, təbii gözəlliyə böyük dəyər verir. İncə ruhu var, nəzakətli və zərifdir. Adamların xoşbəxtliyinə sevinməyi bacarır. Bütün həyatı boyu həm hər şeyin ən yaxşısına sahib olmaq istəyib və həm də ən yaxşısını nümunə göstərmək...

Deyir ki:- “Təbii, Cümhuriyyət dövrünün hətta peşəkar tarixçilər və mütəxəssislər tərəfindən də birmənalı dəyərləndirilməyən məsələləri, eləcə də Cümhuriyyət xadimlərinin bu və ya digər tarixi məqamlarda rolu və iştirakına dair fərqli nəzərləri var və bu da təbiidir. Amma bir qənaət şəksizdir! Bu insanların Azərbaycan adlanan Vətən, Azərbaycan adlanan dövlət və Azərbaycan adlanan xalq-millət qarşısında xidmətləri danılmazdır və bu qənaət saysız sənədlərlə təsdiq və sübut edilir. Bu təsdiq və sübut heç də yalnız tarixi sənədlərlə məhdudlaşmır. Ortada həmin şəxsiyyətlərin hər birinin öz həyat hekayəti var. Cümhuriyyət qurucuları vaxtilə məsuliyyətini və təhlükəsini anladıqları bir yükün altına girərkən yəqin ki, taleyin onlara heç də həmişə lütf etməyəcəyini göz önünə gətirmişdilər və bu yolda bütün məşəqqətlərə, hətta ölümə hazır idilər. Lakin tarixin “İstiqlalçılar” adlanan bütöv bir nəslə qarşı bu qədər ədalətsiz və amansız olacağını, adlarını həyatda saxlayıb, amma bu sevimli Vətənə, qurduqları Dövlətə, “azadlığın ləzzətini dadızdırdıqları” xalqa ömürlük həsrət qoyacağını bəlkə heç ağıllarına da gətirmirdilər…”

Onu Azərbaycan Xalq Cümhuriyyətinin banisi Məhəmməd Əmin Rəsulzadə başda olmaqla qürbət torpaqlarda dəfn olunan digər “qurucu babaların” nəşlərinin niyə Vətənə gətirilməməsi çox düşündürür və bununla barışa bilmir:

“Bu gün cismi faciəvi surətdə haralardasa Vətən torpağına qovuşmuş Nəsib bəy Yusifbəylidən başqa Cümhuriyyət xadimlərinin böyük əksəriyyətinin məzarları qürbətdədir. Yaxın Gürcüstan, qardaş Türkiyə və bir sıra Avropa ölkələri indiyədək qismətlərinə Vətəndən kənarda ölmək yazılmış Dövlət qurucularımızın məzarlarını bizlər üçün ƏMANƏT saxlayır. Məhz ƏMANƏT! Bu, Məhəmməd Əmin Rəsulzadənin sözüdür və o nəslin həmin gerçəkliyə verdiyi təyinatdır. Bəs nə baş verir, zamanmı çox çəkdi? Məmləkətmi qurtulmadı? Millətmi mütəşəkkür çıxmadı? Azərbaycanlımı qədirbilən olmadı? Bəlkə illərdir deyilən, dərc olunan, təkrarlanan, xatırlanan sətirlərin məhz vəsiyyət – vəzifə olduğu anlamı yetişməyib hələ?”- söyləyir...

Çəkinmədən dilə gətirdiyi bu fikirləri dinlədikcə, bu xanımın nə qədər böyük bir insan olduğunun şahidi olursan. Və verdiyi sualları cavablandırmaq üçün, insan nə qədər aciz olduğunun xəcalətini yaşayır…

Qəhrəmanlıq onun alın yazısıdır, ətaləti bir anda strategiyaya çevirməyi bacarır. Elə bu xüsusiyyətinə görə də seçilir. Nə istədiyini yaxşı anlayır və hədəfə doğru cəsarətlə addımlayır. Sirli, qeyri-adi xarakterə malikdir. Aydın, səlist, məntiqli nitqi var, təsiredicidir. Yersiz müdaxiləni xoşlamır, amma haqsızlıq olan yerdə susmur, həqiqəti qorumağa üstünlük verir. Lazım olmadığı halda fikir söyləməsə də, ehtiyac olduğu təqdirdə səsini daha da ucaldır...

El arasında belə bir ifadə var- “Kişi qeyrətli qadındır.” Bəli, haqqında söhbət açdığım Solmaz Rüstəmova- Tohidi də, məhz əsl kişi qeyrətli xanımdır. Onun yanında kimsə Məhəmməd Əmin Rəsulzadə haqqında mənfi nəsə desə, anındaca cavabın alacaqdır. İnanır ki, gələcək nəsillər bizdən daha bacarıqlı, daha inadkar olacaqlar, bizim görə bilmədiyimiz işləri onlar başa çatdıracaqlar. Və bir gün “qurucu babalarımız”ın nəşləri Ana Vətənə gətiriləcək. Eləcə də, nə vaxtsa Bakının mərkəzində respublikamızın banisi- Məhəmməd Əmin Rəsulzadənin nəhəng heykəli ucaldılacaq...

Fevralın 20-si Solmaz xanımın növbəti ad günüdür. Onu bu münasibətlə təbrik edir, möhkəm cansağlığı arzulayıram...

Elman Eldaroğlu

* * *

Müslüm Aslanov

Hörmətli xanım professoru ad günü münasibəti ilə əlaqədar təbrik edirəm, Allah onun ömrünə o qədər bərəkət versin ki, elə bir zaman gəlsin onun və bizim dövlətçilik haqqında arzularımız həyata keçsin, çünki professor Solmaz Rüstəmova milli hökumətimiz olan Azərbaycan Xalq Cumhuriyyətinin təbliğində böyük rol oynayan qeyrətli ailimlərimizdən biridir.

Pervana Memmedli 

Təkcə elə son illər Qubadakı soyqırım şəhidlərini, Cumhuriyyət qurucumuz M.Rəsulzadəni böyük fədakarlıq, zəhmət və tükənməz sevgi ilə bizə hərtərəfli tanıdan Solmaz Rustamova-Togidi xanımı ürəkdən təbrik edir və alqışlayıram.

Minare Pasayeva

Görkəmli elm xadimimizi ürəkdən təbrik edir, can sağlığı, böyük arzularının həyata keçməsini diləyir,elmi yaradıcılığını maraqla izləyirik.

Saadat Shikhiyeva

Solmaz xanımı çox gözəl anlatmısınız. Həqiqətən, bu deyilən sifətlərə layiq, az saylı ciddi və dəyərli tədqiqatçılarımızdan biridir.

QEYD. Başlıqlar "Facebook" sosial şəbəkəsindəki başlıqla eynilik təşkil edir.