"Qalatasaray" Joze Mourinyoya qarşı cinayət işi açacaq

"Qalatasaray" futbol klubunun mətbuat xidməti komandalar arasında baş tutan üz-üzə (0:0) matçdan sonra "Fənərbağça"nın portuqaliyalı çalışdırıcısı Joze Mourinyonu tənqid edib. Oyundan sonra portuqaliyalı bildirib ki, matçın epizodlarından birində bütün Qalatasaray təmsilçiləri “meymunlar kimi ehtiyat oyunçular skamyasına tullanır”.

“Fənərbağça”nın baş məşqçisi Joze Mourinyo Türkiyədə fəaliyyətə başladığı gündən türk xalqı haqqında daim aşağılayıcı açıqlamalar verib. Bu gün onun açıqlamaları əxlaqsız şərhlərdən sadəcə qeyri-insani ritorikaya çevrilib. Joze Mourinyonun irqçi bəyanatları ilə bağlı cinayət işi başlamaq, həmçinin UEFA və FİFA-ya rəsmi şikayətlər göndərmək niyyətimizi rəsmən bəyan edirik”, - “Qalatasaray”ın açıqlamasında bildirilir.

"Fənərbağça"nın mətbuat xidməti Joze Mourinyoya qarşı irqçilik ittihamlarından sonra açıqlama yayıb.

“Baş məşqçimiz Joze Mourinyonun matçın sonunda verdiyi açıqlama tamamilə kontekstdən çıxarılıb və bilərəkdən təhrif edilib.

Hər bir ağlı başında olan insanın görüb başa düşdüyü kimi, Joze Mourinyonun matç zamanı rəqib komandanın texniki komitəsinin hakimin qərarlarına həddindən artıq reaksiyasını ifadə etmək üçün işlətdiyi bu ifadələri heç bir şəkildə irqçiliklə əlaqələndirmək olmaz. Bu diskursu irqçi kimi göstərməyə çalışmaq tamamilə zərərli bir yanaşmadır.

İctimaiyyətin nəzərinə çatdırırıq ki, rəqibi meydandan çıxarmaq, gündəmi dəyişmək və manipulyasiya etmək məqsədi ilə atılan bu qanunsuz böhtanla bağlı qanuni hüquqlarımızdan istifadə edəcəyik”, - klubun X sosial şəbəkəsində (keçmiş Twitter) açıqlamasında deyilir.

“Qalatasaray” 24 oyundan sonra 64 xal toplayaraq Türkiyə çempionatının turnir cədvəlində birinci yerdədir. Portuqaliyalı mütəxəssis Joze Mourinyonun komandasının 58 xalı olan "Fənərbağça" ikinci pillədə qərarlaşıb.