Mətbuat Şurasının sədri Prezidentə təşəkkür etdi

Prezident İlham Əliyevin “Azərbaycan milli mətbuatının 150 illik yubileyinin keçirilməsi haqqında” dünən imzaladığı Sərəncam milli mətbuatın ölkənin ictimai fikir və dövlətçilik tarixində oynadığı rola verilən dəyərin təzahürü olmaqla bərabər, eyni zamanda dövlətimizin və onun rəhbərinin ümumilikdə Azərbaycan mediasına neçə illərdən bəri göstərdiyi qayğının növbəti nümunəsidir.

Bu Sərəncam həm də Ulu öndər Heydər Əliyevin milli mətbuatımızın yubileylərinin qeyd olunması ilə bağlı müstəqillik illərində qoyduğu ənənənin davam etdirilməsinin göstəricisidir. Azərbaycanın da bir parçası olduğu dünya nizamının saysız təbəddülatla üzləşdiyi indiki gərgin dövrdə milli mətbuatımıza göstərdiyi belə nəcib və kübar münasibətə görə dövlətimizin başçısına həm öz adımdan, həm də Azərbaycan Mətbuat Şurasının İdarə Heyəti adından dərin təşəkkürümü bildirirəm.

Sərəncamda cənab Prezidentin Vətən müharibəsi dövründə mediamızın əsl vətənpərvərlik və həmrəylik nümunəsi ortaya qoyduğunu, düşmən qüvvələrin yaydığı saxta məlumatların ifşası istiqamətində xüsusi səy göstərdiyini, silahlı qüvvələrimizin rəşadəti ilə bağlı zəngin salnamə yaratdığını xüsusi vurğulaması onun müasir jurnalistikamıza nə qədər böyük önəm verdiyini göstərən yaddaqalan nüans kimi gələcək fəaliyyətlərində ölkə jurnalistlərinə stimul verəcək əhəmiyyətli məqamdır. Sərəncamda həmçinin bu gün mediamızın ölkəmizin tərəqqisinin və müasir cəmiyyət quruculuğu prosesinin fəal iştirakçısı olduğu vurğulanmaqla bərabər, yeni fəaliyyət prinsiplərinin hökm sürdüyü müasir dövrün Azərbaycan mediası qarşısında yeni vəzifələr müəyyənləşdirdiyi, mediamızın müasir tendensiyaları nəzərə almaqla dövlətimizin maraqlarını həmişə uca tutmalı olduğu qeyd edilir, əslində, Azərbaycanın söz sahibi dövlət kimi dünya düzənində həmişə güclü mövqedə dayanması üçün çağdaş jurnalistikamızın və biz jurnalistlərin də üzərinə böyük məsuliyyət düşdüyü xatırladılır.

Ümumiyyətlə, cənab Prezidentin bu Sərəncamını ümumən Azərbaycan mətbuatının gələcək fəaliyyət istiqamətləri ilə bağlı bitkin və hərtərəfli yol xəritəsi də adlandırmaq olar.

Sənəddə jurnalistikamızın keçmişi ilə bu gününü əlaqələndirməyə, gələcəyə baxış bucağını optimallaşdırmağa imkan verən bir çox müddəalar səsləndirilir, tutarlı arqumentlər sadalanır. Əminəm ki, Azərbaycan mediası və jurnalistikası üçün əlamətdar bir tarixlə - milli mətbuatımızın 150 illik yubileyinin keçirilməsi ilə bağlı imzalanmış bu Sərəncam böyük tarixə yüksək dəyərin ifadəsi olmaqla bərabər, həm də mediamızın sabahı və inkişafı baxımından yaddaqalan mühüm bir dövlət sənədi kimi uzun illər xatırlanacaq.

Zaman, müasir dünya bütün fəaliyyət sahələrində olduğu kimi, jurnalistika sahəsində də baş verən yeniliklərlə, sürətlə inkişaf edən informasiya texnologiyaları ilə ayaqlaşmağı, baş verən ardıcıl proseslərdən geri qalmamağı diktə edir. Bu prosesdə, şübhəsiz, biz jurnalistlərin üzərinə böyük məsuliyyət düşür. Belə məsuliyyətli dövrdə Azərbaycan dövlətinin mediamıza ardıcıl olaraq dəstək verməsi biz jurnalistlər üçün bir üstünlük, bir şansdır. Cənab Prezidentin milli mətbuatımızın 150 illik yubileyinin keçirilməsi ilə bağlı son Sərəncamı da dövlətimizin Azərbaycan mediasına ciddi dəstəyini nümayiş etdirən növbəti mühüm sənəddir. İnanıram ki, hər birimiz bu məsuliyyətin ciddiliyini nəzərə alıb üzərimizə düşən vəzifələrin öhdəsindən layiqincə gəlmək üçün əlimizdən gələni edəcəyik. Buna müasir peşəkar jurnalistikamızın gücü də yetər, potensialı da.

Rəşad Məcid,

Azərbaycan Mətbuat Şurasının sədri

* * *

Ramil Mehdiyev

Cənab Prezidentə tarixi Sərancama görə minnətdarlığımızı bildiririk. Təklif edirəm ki, Sizin rəhbərlik etdiyiniz təşkilatın təşəbbüsü ilə milli mətbuatımızın yaradıcısı olan Həsən bəy Zərdabinin doğma yurdu olan Zərdab rayonunda da tədbir təşkil olunacaqdır. Siz bu addımla Həsən bəyin ruhunu şad etmiş olardınız. Reshad Mecid müəllim təklifimə müsbət cavab verəcəyinizə ümüd edirəm. Öncədən təşəkkür edirəm.

Vüqar Əhməd

Allah eləsin yubileylə bağlı mətbuat tariximizi araşdıran, monoqrafiyar yazan, transfonoletarasiya edən tədqiqatçılar dəyərləndirilsin. Tanışlıq rol oynamasın.İnşallah!

Самира Бехбудгызы

Cənab Prezidentə imzaladığı tarixi Sərəncama görə təşəkkür edirəm. Bütün layiqli mətbuat nümayəndələri üçün düşərli olsun. İnanıram ki, Mətbuat Şurası Həsən bəy Zərdabi ən'ənələrinə 25 il boyunca sadiq qalan (bəndənizi nəzərdə tuturam) art-publisistlərin zəhmətini dəyərləndirməyi unutmayacaq.

Gülnar Əsədli

Hörmətli dövlət başçımızı məhəbbət və təşəkkür duyğusu ilə alqışlayıram,var olsun!

İnşallah,bu sərəncam jurnalistikanı ,mətbuatı yad ünsürlərdən göz bəbəyi kimi qoruyan jurnalistlərə uğurlu, düşərli olacaq!

Abid Tahirli

Tarixi Sərəncamın icrası Azərbaycan mətbuatının zəngin, şərəfli tarixinin , onun yaradıcılarının irsinin yeni tələblər baxımından hərtərəfli, dərindən araşdırılmasını, dəyərləndirilməsini tələb edir.

Sovet rejimi və kommunist ideologiyasının prinsipləri ilə daban dabana zidd olan , hər cür təqib, təhdidlərdən çəkinməyərək isğala, istilaya qarşı mübarizə edən, Azərbaycanın istiqlalı uğrunda mücadilə aparan mühacirət mətbuatın tədqiqi , onun ideallarının təbliği də yubileyə böyük töhfə olardı. Öhdəlik götürmək ciddi və məsuliyyətli bir işdir. Bunu dərindən dərk edərək, 30 ildən də çox bir müddət ərzində, mətbuatın, xüsusi ilə mühacirət mətbuatının araşdırılması ilə məşğul olan mütəxəssis kimi iki hissədən "Azərbaycan mühacirət mətbuatı" adlı kitabımın yeni, təkmilləşdirilmiş variantının nəşrə hazırlamağı məqsədəuyğun hesab edirəm. Ümid edirəm ki, əlaqədar qurumlar bu təşəbbüsü dəstəkləyəcəkdir.

Şəfəq Nasir

Prezident İlham Əliyevin “Azərbaycan milli mətbuatının 150 illik yubileyinin keçirilməsi haqqında” imzaladığı Sərəncam peşəkar jurnalistlər tərəfindən böyük rəğbətlə qarşılandı. Qarşımızda geniş üfüqlər açdı... Milli mətbuatımıza göstərdiyi açıq münasibətə, qayğıya görə, Rəşad Məcidin çənab Prezidentə təşəkkürü də jurnalistlərin ürəyindən oldu. İndiyə qədər milli mətbuatın araşdırılması, bir sıra jurnal və qəzetlərin tədqiqi, transliterasiyası, materialların elmi, ədəbi baxımından təhlili, tarixi keçidlərin öyrənilməsi istiqamətində çox işlər görülmüşdür. Lakin dövrlərin ictimai, mədəni mühitinin, maarifçilik ənənələrinin öyrənilməsi sahəsində qarşımızda hələ nə qədər vəzifələr var. Əziz həmkarlarım, bu yolda hər birinizə uğurlar arzulayıram.

Rüstəm Məlikov

Bölgə mətbuatının ənənələrini 100 ildən çox yaşadan Salyan rayonunun “Qələbə” qəzetinin kollektivi də cənab Prezidentimuzim bu sərəncamını alqışlaylr.Böyük Əlibəy Hüseynzadənin dünyaya gəldiyi yurda da mətbuta dəyər verilir və yaşadılır

QEYD. Başlıqlar "Facebook" sosial şəbəkəsindəki başlıqla eynilik təşkil edir.