Azər Həsrət: 

Mehriban Ələkbərzadəyə bu ifadələri yapışdırma cəhdi yalnız qərəzdən doğa bilər!

Uzun illər bu haqda danışmamışam. Lakin sonra düşündüm ki, danışım, hətta “Mən tanıqlıq edirəm” adlı bir roman da yazdım. Söhbət 20 yanvar 1990-cı ilin məlum hadisələrindən gedir. Ki, mən o hadisələrdə çox fəal rol alan gənclərdən biri idim. Ağır texnikanın qarşısında və güllə yağışının altında olmuşam, sadəcə şansım gətirib, sağ qalmışam. Buna görə heç vaxt nə dövlətə, nə millətə, nə də hansısa bir şəxsə minnət qoyduğum olmayıb! Dövlətdən də heç vaxt buna görə hansısa imtiyaz tələb etməmişəm! Ümumiyyətlə belə bir şeyi şəxsiyyətimə sığışdıracaq birisi də deyiləm, tanıyanlar bilir.

Sözüm ondadır ki, az öncə sosial mediada dəyərli sənətçi, sözün həqiqi mənasında milli təəssübkeş və cəfakeş teatr-sənət fədaisi Mehriban Ələkbərzadənin bir paylaşımı çıxdı qarşıma. Paylaşımda Mehriban xanımın həmkarı Məsmə Aslanqızı ilə bağlı fikirləri yeri alıb. Bildirilir ki, onların arasında bir məsələ olub, Məsmə xanım da narazı qalaraq onu ictimailəşdirib və beləcə də aləm dəyib bir-birinə. Həm də belə anlaşılır ki, Məsmə xanım Mehriban xanımdan mənzillə təminat tələb edib, Mehriban xanım da bu işin ona aid olmadığını, məsələni həll edə bilməyəcəyini deyib və s...

Elə buna görə də Məsmə Aslanqızının Facebook hesabını tapıb sözügedən məsələ ilə bağlı paylaşımını oxudum. Uzun-uzadı bir paylaşımdır. Çalışıb diqqətlə oxudum və uzun illərin ictimai fəalı, jurnalisti, özəlliklə də siyasi şərhçisi olaraq o paylaşımda siyasi manipulyasiya və Mehriban xanımın şəxsiyyətinə - fəaliyyətinə qərəzli kölgə salmaq cəhdini açıq şəkildə görə bildim. Və təəssüfləndim...

Misal üçün, Məsmə xanım yazır: “Vəzifə kürsüsündə əyləşən şəxs ilk növbədə xalqına, onun dəyərlərinə və şəhidlərinə sədaqət nümayiş etdirməlidir. Əgər bir insan bu əziz və toxunulmaz dəyərlərə laqeyd yanaşırsa, hətta onları alçaldırsa, o zaman o şəxs nə mənəvi, nə də hüquqi baxımdan rəhbər vəzifə daşımağa layiq deyil”.

Kim kimə deyir bu sözləri? Mehriban Ələkbərzadə şəxsiyyətinə belə sözlər ünvanlamaq üçün ya onu tanımamalı, ya da tanıdığı halda qərəzli olmalıdır bir insan!

Mehriban Ələkbərzadənin ümumiyyətlə həyat kredosu, yaşam tərzi və var olma səbəbi məhz elə milli dəyərlərə xidmət etməkdir. Bunu da ayrıca sübut etməyə gərək belə yoxdur! Onun filmləri, tamaşaları, araşdırmaları Mehriban Ələkbərzadənin sözügedən dəyərlərə münasibətinin danılmaz sübutudur!

Üstəlik, soylu bir nəsildən gələn Mehriban xanıma qarayaxma cəhdi ciddi təəssüf doğurmaya bilməz! Kiməsə ev lazımdırsa, bunun üçün dövlətin müvafiq qurumlarına müraciət etmək daha doğru olmazmı? Həm də Azərbaycan dövlətinin 20 yanvar şəhidlərinin ailələri üçün nəzərdə tutduğu imtiyazlardan istifadə məsələsini məgər hansısa teatr və onun bədii rəhbəri, baş rejissoru, direktoru həll edir ki?

Məsmə xanım belə bir fikir də yazıb: “Unutmamalıyıq ki, şəhidin adına toxunmaq, bütöv bir xalqın yaddaşına toxunmaq deməkdir. Bu isə bağışlanmazdır”.

Yenə də deyirəm, cəmiyyət içində məhz milli məsələlərə həssaslığı ilə tanınan, bu yöndə bacardığından da çox iş görən Mehriban Ələkbərzadəyə bu ifadələri yapışdırma cəhdi yalnız qərəzdən doğa bilər!

Sonda təkrar xatırladıram ki, mən 20 yanvar hadisələrinin iştirakçısı olmuşam və heç vaxt heç kimə buna görə minnət qoymamışam! Çünki təmənnasız insanam! Çünki dövlətə, millətə qarşılıqsız xidmət etmişəm, edirəm, edəcəyəm də! Elə Mehriban Ələkbərzadə də eyni qaydada təmənnasız bir sənət fədaisidir! Ona görə də Ona ünvanlı qərəzə biganə qala bilməzdim...

* * *

Vasif Efendi

Mehribanla məktəbdə bir parta arxasında oturmuşam və onun nə qədər mərd və doğru bir insan olduğunu təsdiq edirəm.

İlgar Turkoglu

Bir vaxtlar TV proqramları ilə gündəm yaradan, dəyərli araşdırmaları ilə qutsal işlərə imza atan Mehriban xanımın son günlər adı qalmaqallarla gündəmdədir. Ola bilsin, bu, xüsusi bir kampaniyanın tərkib hissəsidir. Şəxsi mövqeyim belədir ki, gərək Mehriban xanım vəzifəyə getməzdi..

Azer Hasret

İlgar bəy, amma Mehriban Elekberzade Dram Teatrına yeni bir həyat verib, onu da unutmayaq məncə.

Elmuraz Nəbiyev

Mehriban xanım milli və yaradıcı adamdır.

QEYD. Başlıqlar "Facebook" sosial şəbəkəsindəki başlıqla eynilik təşkil edir.